Социальнай хантараагы ылыыга уларыйыылар киирдилэр

Тылы сайыннарар кииҥҥэ сарсыардааҥҥы дьарык. Уопуттаах логопед оҕо хас биирдии дорҕоону сөпкө саҥарыытын анал бырагыраамаҕа олоҕуран туруорар. Бу дьоҕус киини Анджела Матаннанова үлэлэппитэ сыл аҥаара буолан эрэр. Элбэх оҕолоох эдэр ийэ бэйэ дьыалатын арыныытыгар социальнай хантараак улахан тирэх буолбут. Көмө харчынан кини дьарыктыыр матырыйаалларын, үөрэтэр тэриллэрин ылбыт. Маны таһынан "Мой бизнес" тэрилтэ тэрийбит "Мама - предприниматель" диэн күрэҕин гранын кыайбыт.

Анджела Матаннанова, "Мама-логопед" киин салайааччыта: “Ааспыт сылга социальнай хантараакка биэрбитим. Онно ыҥырбыттарыгар хамыыһыйаҕа бисзнес -былааммын көмүскээбитим. Үп-харчы өттүнэн улахан көмө буолар. Маны сэргэ “Мама-предприниматель” күрэххэ уһуйааччым олус көмөлөспүтэ. Хайдар инниктин сайдарга, бизнес былааны суруйарга улахан көмөнү оҥорбуттара”.

Тылы сайыннарыыны тэҥэ  кииҥҥэ биирдиилээн предметтэргэ эбии дьарыктар итиэннэ алын кылаас оҕолоро дьиэтээҕи үлэлэрин ааҕар куруһуоктара үлэлиир. Онон Анджела бэйэтэ да дьарыктаах буолбут  уонна үлэ миэстэтин таһаарбыт. Кини урбаанньыт буолуутугар "Мой бизнес" киин улахан көмөнү оҥорбут. Бу тэрилтэ бэйэ дьыалатын тэринээччилэргэ, чуолаан социальнай хантараакка киирсээччилэргэ, бизнес былааны босхо оҥорон биэрэр. Быйыл бу көмөнү туһаныыга кэккэ уларыйыылар киирдилэр.

Дьулус Иванов, "Мой бизнес" киин өҥөнү оҥорор салаатын менеджерэ: "Бу сылтан социальнай хантараакка кытааччылар сайаапка биэрэн баран тургутууну ааһыахтаахтар. Тургутук урбаанньыт буоларга бэлэми быһаарар. Ону аастахтарына бихнес былааннарын көмүскүүллэр. Онтон сатаан ааспатахтар биһиги тэрилтэбитигэр эбэтэр туһааннаах министиэристибэҕэ босхо үөрэҕи ааһаллар".  

Маны тэҥэ быйылгыттан хантараак кээмэйэ 350 тыһыынчаттан 500 тыһыынчаҕа диэри үрдээтэ. Хантараак түһэрсии хайысхалара араас. Ол курдук үп-харчы өттүнэн ыарахан балаһыанньаттан тахсыы, дьарыктаах буолуу, кэтэх хаһаайыстыбаны сайыннарыы итиэннэ бэйэ дьыалатын арыныы. Сыллата социальнай хантараагы түһэрсээччи ахсаана  элбиир.    

Ол курдук ааспыт сылга 6,5 тыһыынча дьиэ кэргэҥҥэ социальнай хантараак быһыытынан өйөбүл оҥоһуллубут. Былырыыҥҥы судаарыстыбаттан көрүллүбүт көмө кээмэйэ 822 мөлүйүөҥҥэ тэҥнэспит. Бу бырагыраама 2010 сыллаахтан Саха сиригэр үлэлиир. Биһиги өрөспүүбүлүкэбит биир бастаыканан пилотнай регион быһыытынан саҕалаабыта.

Бу сыллар тухары 25 тыһыынчаттан тахса хантараак түһэрсиллибит. Көмөнү бэйэ дьыалатын тэриниигэ туһааннаах тиэхиникэни, матырыйааллары, миэбэли ылыахха сөп итиэннэ куортам төлөбүрүгэр туһанар эмиэ көҥүллэнэр.