Саха сирин кардиохирургтара дойду таһымыгар уустук эпэрээссийэлэри оҥороллор
Хаҥалас улууһун Покровскай куоратын олохтооҕо Виктор Кузьмин бу кэнники икки сылга сүрэҕэ моһуоктаан ыалдьан балыыһаҕа көрдөрүнэр түбүккэ сылдьыбыта. Эрдэ сүрэҕэ ишемическэй ыарыыттан стент туруортарбыта. Ааспыт ахсынньы ыйга улууһун киин балыыһатыттан направление ылан манна сүрэх-тымыр киинигэр эмтэнэ киирбитэ. Салгыы чинчийии баран эпэрээссийэҕэ бэлэмнэммитэ, ол эрээри ыарыыта олус бэргээн эпэрээссийэни суһаллык оҥорорго күһэллибиттэрэ.
Виктор Кузьмин, Хаҥалас улууһун олохтооҕо: "Суһал эпэрээссийэни ааспытым төрдүс күнүм. Туругум күн-түүн тупсан иһэр".
Өрөспүүбүлүкэтээҕи сүрэх, тымыр киинэ аһыллан үлэлээбитэ иккис сылыгар барда. Бу кылгас кэм иһигэр аныгы ирдэбилинэн тутуллубут, толору хааччыллыбыт Кииҥҥэ бүтүн 9 тыһыынча кэриҥэ киһи туһааннаах көмөнү ылан ааста. Күннэтэ араас хабааннаах эпэрээссийэлэри тиһигин быспакка оҥороллор. Кардиохирургия салаата сүрүннээн сүрэххэ аһаҕас эпэрээссийэлэри оҥоруунан дьарыктанар. Маныаха төрүөҕүттэн сүрэҕэр порогтаах оҕотуттан саҕалаан, улахан киһиэхэ, кырдьаҕастарга араас сүрэх тымырын ыарыыларын, тэбэр тэтимин кэһиллиитин эпэрээссийэлэрин барытын оҥороллор. Киин үлэҕэ киириэҕиттэн кардиохирурдар саҥа технологиялары, ньымалары баһылаан уһулуччу уустук эпэрээссийэлэри ситиһилээхтик ыытан тураллар.
Пётр Захаров, СӨ сүрэх-тымыр киинин кардиохирургическай салаатын сэбиэдиссэйэ: "Хорук тымыры клапанын кытары уларытыы эпэрээссийэтэ быйыл ситиһиилээхтик оҥоһуллубута. Мин уолаттарым, Портнягин Петр Петрович ол уустук эпэрээссийэни оҥорбута. Онтон мин үөрэбин. Маны сэргэ сүрэх кыаммат буолуутугар хаҥас куртаҕын солбуйар аппарааты олордубуппут".
Саҥа оборудование, аныгы технологиялар киирэн үлэ биллэ тэтимирэн ыарыһах көрдөрүнэригэр бары усулуобуйа баар. Маныаха улуустары кытта үлэ телемедицинэ көмөтүнэн ыытыллар. Чинчийии эмиэ араас оборудованиенан чопчу оҥоһуллар буолар, диагноз туруоруута судургутуйан турар. Манна направлениенан биитэр суһал көмөнү киһи бэйэтин көрдөрүүтүнэн эмиэ оҥоруохтарын сөп. Сүрэх-тымыр ыарыытыгар сүрүн болҕомтону эрдэттэн сэрэтии үлэтэ ылар.
Станислав Жирков, М.Е. Николаев аатынан медицинэ национальнай киинин генеральнай дириэктэрэ: "Суһал үлэҕэ бу ньымалары ыалдьыбыт киһиэхэ туһанар буоллахпытына билигин улахан болҕомтону сэрэтии үлэтигэр уурабыт. Сүрэх-тымыр ыарыылара эрдэттэн сэрэтии үлэтинэн барыахтаахтар диэн. Бу икки сыл иһигэр кииммит бырыакка киирбит күүһүгэр толору тахсан турабыт. Сүрэх-тымыр ыарыыттан өлүүнү 10% кыччаттыбыт".
Доруобуйа национальнай бырайыак чэрчитинэн салгыы өссө элбэх соруктар, былааннар тураллар. Ааспыт сылга манна мэйиини үөрэтэр уонна нейрогенетика киинэ эбии аһыллыбыта. Онон нэһилиэнньэ, дьон-сэргэ доруобуйатын туругар кыһаллан ыарыыны аҕыйатыыга үлэлэһэллэр.
