Хаҥалас Үөдэйигэр оскуола аһылынна

Саҥа оскуола күлүүһүн туппут хампаанньа дириэктэргэ туттарар. Мантан ыла Үөдэйдэр өр күүппүт үөрэхтэрин кыһата үлэҕэ киирбитинэн ааҕыллар. Аһыллыы үөрүүлээх тэрээһинигэр Ил Дархан Айсен Николаев кыттыыны ылла. Кини саҥа оскуолаҕа нэһилиэктэрин, өрөспүүбүлүкэлэрин сайдыытыгар үлэлэһэр дьон үүнэн тахсыахтара диэн бэлиэтээтэ.  Дьоҕус оскуола - биир дьиэ кэргэн. Күүтүүлээх күнү көрсө оскуола хас биирдии үөрэнээччитэ, учуутала кыттыылаах хор бэлэмнээбиттэр.

60 миэстэҕэ анаммыт оскуола уопсай иэнэ 1350 кв миэтэрэ. Биир этээстээх дьиэҕэ алын уонна үрдүкү кылаастар үөрэнэр тус туһунан блоктардаах. Киэҥ- куоҥ спорт саалалаах, остолобуойдаах, хас биирдии кабинет аныгылыы хааччыллыылаах.

Прокопий Самсонов, оскуола дириэктэрэ: “Федеральнай бырагырааманан тутулунна. 2021 сыллаахха бастакы сыбаайата түспүтэ уонна икки сыл иһигэр  олоххо киирдэ.  Оскуолабыт толору хааччыллыылаах, кабинеттар бары ирдэбилгэ эппиэтииллэр”.

Үөдэй оскуолатын оҕолоро "Хаҥалас суруйааччылара"  диэн бырайыагы үлэлэтэллэр. Саҥа оскуола бастакы уруогар Павел Харитонов - Ойуку норуодунай суруйааччы "Бурҕаллай" диэн айымныьытын оҕолор эрдэ бэйэлэрэ аахпыттарын истэллэр. оскуола оҕо айар дьоҕурун сайыннарыыга улахан болҕомто ууруллар. Үөрэнээччилэр айымньыларын хомуурунньугун ыалдьыттарга бэлэх ууннулар.

Кыргыттарга труд уруогун кабинета иис сатабылларыгар үөрэнэргэ толору эппиэттиир. Учуутал Евдокия Асекритова  үөрэнээччилэри инникитин дьиэни-уоту дьаһайыыга, иис, астааһын үөрүйэхтэригэр үөрэтэр. Уопуттаах учуутал саҕа оскуолаҕа көспүттэриттэн үөрүүтэ улахан.

Евдокия Асекритова, Үөдэй орто оскуолатын учуутала: “Оверлоктан саҕалаан иистэнэр массыынатыгар тиийэ баар, ону сэргэ ас акстыыр куукуна, паарынан таҥаһы көннөрөр тэрил уонна таҥас кырыйар анал остуол баар”.

Саҥа массыыналарга бастакы сииги 11 кылаас кыргыттара түһэрдилэр. Тутта  үөрүйэх буоланнар тута быһаарса охсоннор тикпитинэн бардылар. Катя Радык үөрэҕэр туйгун, үрүҥ көмүс мэтээлинэн оскуолатын бүтэрэргэ дьулуһар. Экономист буолар баҕа санаалаах. Кинилэр кылаастара саҥа оскуоланы баттаспытыттан олус диэн астынар,  бастакы выпуск буолалларыттан үөрүүтэ муҥура суох.

Катя Радык,  Үөдэй орто оскуолатын үөрэнээччитэ: “Кыргыттары кытары эрдэ тикпит фартукпутугар косынка тигэ олоробут”.

Онтон уолаттар эмиэ туох баар ирдэбилгэ толору эппиэттиир, наадалаах тэриллэринэн хааччыллыбыт кабинеттаннылар. Маһы, тимири быһар араас станоктар турбуттар. Онон туризм сайдар ураты айылҕалаах сиригэр инникитин сувенир оҥоруутунан дьарыктанар баҕалаахтар.  Оҕо саас сылыгар үлэҕэ  киирбит бастакы оскуола оҕолорго, учууталларга үөрэх, үлэ саҥа үктэлигэр тахсалларыгар төһүү буоларын аһыллыыга биэлэтээтилэр.