Өбүгэ утумун ситимнээн

Нэһилиэк аҕам саастааҕа Наталия Негнюрова куруһуок тэриллиэҕиттэн дьарыктана сылдьар. Мария Михайловна уонна Татьяна Васильевна үөрэтиилэринэн саҥа хайысхаҕа тута баттаһан киирбитэ. Билигин номнуо нэһилиэк тарбахха баттанар бастыҥ маастара. Павловскай сылгыһыттара маастардар үлэлэрин өйөөн, сыл аайы сиэлинэн, кутуругунан көмөлөһөллөр. Оттон улахан тэрээһин иннинэ нэһилиэк ыччата түмсэн, айар куттаах, өбүгэ утумун ситимниир аҕам саастаахтарга кэлэн көмө буолаллар.

Наталия Негнюрова, Нөөрүктээйи нэһилиэгин олохтооҕо: "Эстафета саҕана улахан субуотунньуктар буолаллар. Сиэлбитин сааһылыыбыт, тарыыбыт, кырыйабыт. Онно саамай улахан хара үлэлэр буолаллар. Онтон дьэ хатан үлэлээбитинэн барабыт".

Түмсүүгэ сиэлтэн уонна кутуруктан сэлээппэ, дэйбиир, сөрүү хатан оҥороллор. Улуус уонна өрөпсүүбүлүкэ таһымнаах быыстапкаларга анаан сахалыы кэрдииһинньик, харысхал арааһын оҥорон дьон үрдүк биһирэбилин ылалаллар. Саас сынньалаҥар барыы - дьиэҕэ хааллан олоруу буолбатах диэн көхтөөх олохтоох кыргыттар үөлээннээхтэригэр үтүө холобур буолаллар. Кылы хатыы олус элбэх тиэхиньикэлээх, кэмиттэн кэмигэр араас маастар кылаастарга, норуот маастардарын ыҥыран, үөрүйэхтэрин чочуйаллар.

Татьяна Тотонова, сиэл куруһуогун салайааччыта: "Сап оҥороммут күрүчүөгүнэн баайарбыт. Кэнники сайдан улахан сөрүөлэри оҥорор буоллубут. Маны тэҥэ араас сэлээппэлэри оҥортуубут".

Бастакытын хата үөрэнэр киһиэхэ кэккэ ыарахаттардаах буолар эбит. Илииҥ иистэнэ, хата үөрүйэҕэ суох буоллаҕына, бастакы-иккис дьарыккар туох да табыллымыан сөп.

Сыл аайы кыайыы күнүгэр аҕам саастаах, ытык кырдьаҕастарга түмсүү аатыттан эти-сиини чэбдигирдэр араас оҥоһуктары бэлэх ууналлар. Саха сыспай сиэллээҕин кутуруга норуокка эмтээҕинэн биллэр, онон доруобуйаларыгар хааччахтаах дьоҥҥо-сэргэҕэ анаан эмиэ оҥоһуллар. Нэиһилиэк саамай көхтөөх кырдьаҕаһа Светлана Сивцева буолар. Туох баар ыытыллар дьарыктарга, тэрээһиҥҥэ ыччаты кытары тэҥҥэ хардыылыыр. Олох тэтимигэр сылдьан, таптыыр дьарыгар быыс-хайаҕас булан кэлэ сатыыр.

Светлана Сивцева, Нөөрүктээйи нэһилиэгин бэтэрээннэрин түмсүүтүн салайааччыта: "Нөөрүктээйи нэһилиэгэр элбэх куруһуоктар үлэлииллэр. Холобура, “Играй гармонь” диэн Аҕа дойду сэриитин кыттыылааҕа Иванов Владимир Титович  50-чэ сыл анараа өттүгэр төрүттэбит куруһуога. Билигин да үлэлиир, оскуола оҕолоро кыттыһаннар олус үчүгэйдик тэринэн үлэлии сылдьабыт".

Нэһилиэктэр икки ардыларыгар ыытыллар култуура эстафетата норуот маастардарын түмүөҕэ. Биир интэриэстээх дьон тула түмсэн хардарыта уопуттарын атастаһыахтара. Ол кэннэ сиэл куруһуога оскуола оҕолорун хатыы кистэлэҥнэригэр үөрэтиэхтэрэ.