Халаан уутугар бэлэмнэнии саҕаланна

Муус халыҥын очуоттааһынтан халааҥҥа бэлэмнэнии бастакы тэрээһинэ саҥаланна. Ол курдук өрүстэр хойутаан турбуттарын иһитиннэрдилэр. Онтон билиҥҥи туругунан муус нуорматтан чараас. Ол эрэн Өлүөнэ өрүс Пеледуй бөһүөлэгин уонна Өлүөхүмэ, Покровскай куораттар анныларынан, Күһүүр гидропост туһаайыытынан 5 - 15 сантымыатырга тиийэ нуорманы куоһарар. Маннык көстүү Алдан өрүскэ Батамай нэһилиэгэр, Бүлүү өрүскэ, Орто Халымаҕа эмиэ бэлиэтэнэр. Ол эрэн муус халыҥа ааспыт сыл  орто көрдөрүүтүттэн чараас. 

Александр Аржаков, “Ленарегионводхоз” тэрилтэ филиалын дириэктэрэ: «Быйыл муус сүрүн өрүстэргэ ортотунан нуорматтан 20-чэ сантымыатырынан чараас. Ол эрэн Халымаҕа Зырянка уонна Орто Халыма аннынан халыҥ. Билигин онно муус 80-85 сантымыатырга тэҥнэһэр».

Онтон хаар халыҥа эмиэ биир тэҥ буолбатах. Быйыл Анаабыр, Яна, Марха  өрүстэргэ уонна Өлөөн, Бүлүү, Алдан эбэлэр аллараа тардыыларыгар ордук элбэх сөҥүүлээх. Уоннааҕы өрүстэргэ хаар чараас. Бу көрдөрүүлэр саас муус барыытыгар улахан дьайыылаах буолуохтарын сөп. Онон кэмигэр ыытыллар бэлэмнэнии үлэтэ тоҕоостоох.

Быйыл уопсайа барыта 485 гектар иэннээх муус хараардыллыа итиэннэ 41 килэмиэтир эрбэниэ. Урукку дьылларга курдук харыы тахсыан сөптөөх сирдэригэр бу былааннаах үлэ ыытыллыа. Ол курдук Ленскэй, Өлүөхүмэ, Хаҥалас, Нам, Кэбээйи, Үөһээ Халыма, Аллараа  Халыма улуустарыгар  уонна Дьокуускай аннынан кулун тутартан үлэни саҕалыахтара.

Хараардыы уонна эрбээһин үлэтин сыллата "Ленарегионводхоз" тэрилтэ иилээн-саҕалаан ыытар. Кинилэр оҥорор үлэлэригэр федеральнай үптэн 28 мөлүйүөн көрүлүннэ. Үлэ кээмэйэ уонна оҥоһуллар хайысхата уларыйбата. 46 харыы тахсыан сөптөөх сирдэригэр мууһу кэбирэтиэхтэрэ. Маны тэҥэ сааскы уу этэҥҥэ ааһыытыгар сэрэтии үлэтэ араас хайысхалаахтык ыытыллар, ону сэргэ өрүс сүнньүн ыраастааһын, быһыттары сөргүтүү, оҥоруу курдук былааннаах үлэлэр барыахтара

Петр Аргунов, уу федеральнай агенствотын Өлүөнэтээҕи уу салалтатын салайааччыта: “Быйыл бэлэммит үчүгэй. Федеральнай үбүлээһин бигэргэнэн турар. Ол курдук биһиги салалтабыт Саха сиригэр 47 мөлүйүөн курдугу аҕалан олорор”.

Маны тэҥэ кыра өрүстэр түгэхтэрин бөҕөргөтүү Горнай улууһун Хаар Балаҕан үрэҕэр уонна Өймөкөөҥҥө Орто Балҕаҥҥа быйыл ыытыллыа. Маны сэргэ Үөһээ Бүлүү нэһилиэгин аннынан Бүлүү өрүс кытылын оҥоруу түмүктэниэ. Манна бырытыгар дойду бюджетыттан 500 мөлүөйүөн көрүллүбүт.

Петр Аргунов, уу федеральнай агенствотын Өлүөнэтээҕи уу салалтатын салайааччыта: “Сабаҕалаан көрөөһүнү гидромет оҥорор. Билигин сүрүн иһитиннэрии хомулла илик. Кыһыммыт өссө да бүтэ илик, муус кулун тутарга диэри халыҥыыр. Ол иһин быһа барыллаан этэххэ хаар халыҥ, кыдьымах аҕыйах эрээри  мууспут халыҥыан сөп”.

Онтон быйыл сааскы муус хайдах буолуоҕун чопчу сылыктааһына кулун тутар 6 күнүгэр диэри тахсыаҕа, онтон өрүстэр хамсааһыннарын күнүнэн ыйар иһитиннэрии муус устар 17 күнүгэр биллиэҕэ.