"Эркээйи эргиирэ" бырагыраама саҥалыы үлэлиэҕэ

Өлүөхүмэ улууһун Хоро нэһилиэгиттэн кэлэ сылдьар Спиридон Собакин бэйэтэ музыка учуутала уонна олохтоох оскуолаҕа тэрийээччинэн үлэлиир. Хоро орто оскуолата ааспыт сылтан "Эркээйи эргиирэ" бырагыраамаҕа киирсэн үлэлиир. Спиридон Спиридонович орто кылаастар үөрэнээччилэригэр оҕо сайдар эйгэтин тэрийиигэ, чуолаан төрүт ийэ тылы иҥэриигэ үлэлэһэр.

Спиридон Собакин, Өлүөхүмэ улууһун Хоро нэһилиэгин орто оскуолатын учуутала: "Оскуолабытыгар тэрээһиннэрбит барыта сахалыы бараллар, араас оонньуулары төрүт тыланан ыытабыт".

"Эркээйи эргиирэ" бырагыраама өрөспүүбүлүкэ үрдүнэн Үөрэх министиэристибэтин, үөрэх тэрилтэлэрин, педагогтар, уһуйааччылар, учуонайдар көмөлөрүнэн таҥыллан бэлэмнэммитэ. Манна оҕо саадтар, оскуолалар, орто, үрдүк үөрэх кыһалара, оҕо мөрүөн холбоһуктара, ыал, түөлбэ биир эйгэ буолан оҕо сайдар, уһуйуллар үлэтин саҥалыы хайысхалаан сирдэтинэллэригэр олук буолар. Таатталар бүттүүн улууһунан бу бырагыраамаҕа хабыллан үлэлииллэр.

Мира Луковцева, Таатта улууһун үөрэҕириигэ салалтатын методическэй үлэҕэ сэбиэдиссэйэ: «Бу бырагыраамаҕа киирэр элбэх уһуйааннардаахпыт, оскуолалардаахпыт бастакы “Эркээйи эргиирин” саҕаттан. Билигин улууһунан пилотнай былаһаакка буолан олоробут. Бырагырааманы олус диэн сөбүлүүбү, сэҥээрэбит уонна бэйэбит этиилэрбитин этэ, уопуппутун үллэстэ кэлэ сылдьабыт».

Өрөспүүбүлүкэтээҕи лицей дьиэтигэр үөрэҕирии үлэһиттэрин тохсунньутааҕы сүбэ мунньаҕын чэрчитинэн, бу бырагыраамаҕа кыттыһан үлэлэһэ сылдьар пилотнай былаһааккалар бэрэстэбиитэллэрэ кэлэн биэс бөлөххө арахсан инники соруктары, бу хайысхаҕа үлэлэһэр көхтөөх педагогтары көҕүлээһин, итиэннэ бырагыраама олоххо киирэр өрүттэрин тула дьүүллэстилэр.

Геннадий Охлопков, СӨ оҕолорун уопсастыбыннай холбоһуктарын сойууһун бэрэссэдээтэлэ: «Бу бырагыраама 24 сааһын ситиэр диэри ыччат дьону хабар. Тоҕо диэтэр бу сааска идэтин баһылыыр, ыал буоларга бэлэм буолар. Саҥа ыалга оҕо төрүүр, оччоҕо бу бырагыраамабыт салгыы бара туруохтаах. Олох эргиирин хааччыйар бырагыраама буолан тахсар».

Аныгы оскуолаҕа, оҕо саадыгар, дьиэ кэргэҥҥэ, түөлбэҕэ оҕону, ыччаты иитии-дьаһайыы үлэтин оннугар уһуйуу, сайыннарыы, сатабылланыы үлэтэ былааннаахтык ыытыллыахтаах. Ол эбэтэр сүрүн ис хоһооно- оҕо, ыччат кыра сааһыттан бэйэтин билинэр, сайдар, ис кыаҕын арына сатыыр, олоххо, дьону кытта сыһыаҥҥа сатабылланар, ырытар-көннөрүнэр эппиэтинэстээх буоларга уһуйуллар.

Татьяна Ильина, "Эркээйи эргиирэ" бырагыраама ааптара: "Дьиэ кэргэҥҥэ оҕону хайдах сайыннарар эйгэни тэрийэргэ туох ыарахаттары көрсөбүт, ханнык суолунан барыахтаахпытый диэн. Онон маҥнайгынан дьиэ кэргэни туруордубут. Оҕо сайдыыта аан маҥнай дьиэ кэргэнтэн саҕаланар".

Мунньах түмүгүнэн хас биирдии бөлөхтөн этиилэри ылынан бырагыраама салгыы үлэлиир хайысхаларын тобуллулар уонна Саха сиригэр эбии кэҥээн тарҕанарыгар санааларын үллэһиннилэр.