Сатабыллаах салайааччы бөһүөлэгэр 85 үлэ миэстэтин хааччыйар

Федеральнай суол айанньыттара кэлэ-бара тохтоон сынньанан ааһар сирдэрэ. Төҥүлү бөһүөлэгин анныгар турар «Уют» кафе ыраахтан-чугастан кэлбиттэри күнүстэри-түүннэри итии чэйинэн, сылаас аһынан күндүлүү көрсөр. Айанньыттар билэрдии ыраахтан уотунан сандаарар кафеларын ааһа барбаттар.

Сергей Бандеров, ыраах айан суоппара: «На машинах на север ездим. Сюда заезжаем покушать постоянно. Раньше на этом месте ничего небыло».

Урукку өттүгэр ыраас хонуунан көрөн турбут сир сатабыллаах киһи өйүнэн күн бүгүн айанньыттары абырыырын таһынан олохтоох дьонугар үлэ таһааран биир дойдулаахтарын махталларын ылыан ылар. Иван Борисов кафетын манна 2001 сыллаахтан арыйан, күн бүгүн кэҥээн 80-тан тахса үлэ миэстэтин арыйан таһаарыылаахтык үлэлии олорор.

Иван Борисов, эргиэмсик: «Барыта 80 курдук киһи үлэлиир, ол таһынан өссө дуогабарынан үлэлииллэр. Кэлэ-бара сылдьар үлэһиттэр эмиэ бааллар: электрик, сантехник. Бөһүөлэк хас эрэ араҥатын хамнастаан олорор дьон буоллахпыт. Биһигини Халыма суола абырыыр».

Элбэх киһи кэлэр-барар буолан манна өрүү сэргэх, сонун-нуомас кэлэ турар. Үлэни дьүөрэ хамнас үтүөтэ үлэһиттэри эмиэ үөрдэр.

Любовь Сметанникова, каасса үлэһитэ: «30 киһи үлэлиир. Хамнас, коллектив үчүгэй, манна үлэлиирбитин сөбүлүүбүт».

Биллэн турар айанньыты минньигэс ас-үөл угуйар. Ол барыта тарбахтарыгар талааннаах, эйэҕэс-сайаҕас асчыттартан быһаччы тутулуктаах. Үлэҕэ сыстаҕас Сардаана Кычкина кафеҕа алтыс сылын үлэлиир. Кини бииргэ үлэлиир дьонугар махтанар, салайааччытынан киэн тутта кэпсиир.

Сардаана Кычкина, асчыт: «Иван Ивановичпыт сүрдээх дьону түмэр, икки нэһилиэгинэн дьоннору үлэннэн хааччыйар».

Иван Борисов кафета суоллааҕы атын кафелартан чыҥха ураты. Манна киэҥ тиэргэннээх. Айаҥҥа тохтоон, алдьанан араас буолар түгэннэригэр сынньанар дьиэлээх, тымныы кэмҥэ массыына турарыгар гаражтаах. Ону тэҥэ кэлин таас баанньык тутан олохтоохтор тиһигин быспакка сылдьар буолбуттар. Биир уратыта диэн манна сэбиэскэй кэминээҕи муспут малларын хаһаайын анал витриналарга көрдөрүүгэ туруоран урукку кэминээҕи олох чахчыларын кэрэһилиир түмэл оҥорбут. Оттон тэлгэһэҕэ таһыттан киирээти харахха быраҕыллар кыыл-сүөл түмэлэ турар. Ону тэҥэ саха былыргытын көрдөрөр маллаах-саллаах балаҕан муннуга баар. Ыалдьыттар көрөр кэрэхсиир сирдэрэ.

Юлия Быковская, айанньыт: «Здорово придумали. На федеральной трассе, где мы останавливались, я не встречала, чтобы был музей в кафе».

Бу соторутааҕыта эрэ Иван Иванович аны биир дойдулаахтарын үөрүүтүгэр бэкээринэ арыйбыт. Кини бурдук ас арааһын хаҥатар соруктаах. Онон сатабыллаах эргиэмсик идиэйэтэ олох тэтимин батыһа сөптөөх дьаһалынан олоххо утум-ситим киирэн иһэрэ бэйэтин эрэ буолбакка бар дьону үөрдэр.