Саха сирин үрдүнэн 180 тыһ. тахса сылгы кыстыыр

Бу Хонор диэн ааттаах сиргэ Хаҥалас улууһун Улахан Аан нэһиллиэгин "Бөртө" собуотун сылгыһыттара былырыыҥҥы төрүөхтэрин аһатар түбүккэ сылдьаллар. Манна 70 төбө тыйы аһаталлар, оттон арыыга уопсайа икки сүүсчэкэ сылгы кыстыыр. От сыта дыргыйан эдэр сылгылары ыраахтан угуйар. Улахан Аан олохтооҕо Александр Абрамов урут уруккуттан сүөһү-сылгы көрүүтүгэр сылдьар уопуттаах үлэһит. Хас күн аайы тымныыны, туманы аахсыбакка, сарсыарда эрдэттэн сылгыларга эбиэс, от биэрэр. Бөртө сылгы собутугар бүгүҥҥү күҥҥэ биир тыһыынчаттан тахса сыспай сиэлээх баар, онтон аҥара кэриэтэ биэ.

Александр Абрамов, "Бөртө" сылгы собуотун үлэһитэ: «7 чааска тахсан аан маҥнайгы эбиэстэтэбин онтон от уонна күөх маасса биэрэбин».

Сылгылар уопсайа үс звенонан тураллар, маннык арыынан, алаастарынан сылдьаллар. Аһылыгы киэҥ хонуунан тарҕатарга үлэһит ат уонна тыраахтыр көмө буолар. Тыраахтыр иккитэ кырынан күннээҕи от нуорматын тиэйэр. Эдэр сылгылары аһатыы арыый судургу эбит буоллаҕына, улахаттары булуу даҕаны уустук. Ол эрээри күннэтэ уопуттаах сылгыһыттар ир суолларын ирдээн аһаталлар.  

Александра Петрова, СӨ ТХМ сүөһү иитиитигэр департаменын сүрүннүүр исписэлииһэ: «Сылгылар сайыммыт үчүгэй буолан туруктара орто. Сылгыбыт ахсаана 180600 төбө ол иһиттэн биэтэ 121400 төбө. Эбии аска киирэн турар сылгыбыт ахсаана 7700 төбө, уопсай сылгы ахсаныттан 4.3%. ».

Бөртө хаһаайыстыба эмиэ окко былаанын аһара толорон, 3,5 тыһ. кэриҥэ тонна оту оттообута, 2 тыһ. тонна сиилэс, 1 тыһ. тахса тонна сенаж, күөх маасса бэлэмнээбитэ. Бэл сүүһүнэн тонна оту, күөх маассаны Мииринэй улууһугар Новай совхозка атыылыыр кыахтаммыта. Кыһыҥҥы өттүгэр ынахтар үүттэрэ тардар, ол да буоллар хаһаайыстыба үүтүн көрдөрүүтэ үрдүк, күҥҥэ биир тонна кэриҥэ үүтү ыы олороллор.

Леонид Лыков, "Бөртө" сылгы собуотун хаһаайыстыбатын ыанньыксыта: «38 ынах баар. Үүттэрэ уолан эрэр, төрөөрү сылдьаллар. Бу ый бүтүүтүгэр саҕаланыаҕа. Саамай элбэх үүтү биэрэр – 10 л. Уоннааҕылар кыраны. Туруктара үчүгэй».

Бөртө хаһаайыстыбаҕа билигин 760 тахса ынах-сүөһү этэҥҥэ кыстаан турар. Онтон ыанар ынаҕа 357. 

Ааспыт сайын хаһааҥҥытааҕар даҕаны үтүө, өҥ сайын туран, кыстыкка киириигэ былааннаммыт от барыта оттоммута. Ол курдук өрөспүүбүлүкэ үрдүнэн 463 тыһ. тахса от оттонон, былаан 101% туолбута. Онон хас да сылтан бэттэх от хамапаанньата ситиһиилээхтик түмүктэнэн хаһаайыстыбалар кыстыгы толору оттоох көрсүбүттэрэ. Бүгүҥҥү күҥҥэ 65% от, сенаж 70% уонна сиилэс 75% бырыһыана хаалла. Онон аны саас, күөххэ үктэниэхпитигэр диэри тиийэр от саппааһа толору баар.