«Муусука барыбытыгар» бырайыак салҕанар буолла

Норуот инструменнарын кылааһа Илья Чаҕылҕан «Хайыһар» ырыатын оонньуур. Учууталлара Зоя Корнилова оҕолорун кытары тэҥҥэ доҕуһуоллуур. Уопуттаах уһуйааччы сатабыллаах салайыытынан бииртэн биир матыыбы тардан иһэллэр.

Зоя Корнилова, Дьокуускай куорат 26-с №-дээх оскуола «Муусука барыбытыгар» бырайыак салайааччыта: «Биһиги бу бырайыагынан оҕолор өйдөрүн-санааларын сайыннарабыт. Оҕолорбут Аан дойду, Арассыыйа, Өрөспүүбүлүкэ таһымнаах конкурстарга кыттыыны ылаллар».

Бастакы нүөмэрдээх оҕо исскуствотын оскуолатыгар оҕолору муусука үгүс хайысхатыгар дьарыктыыллар. Учууталлар хас биирдии оҕону бары өттүттэн сайыннарарга дьулуһаллар. Оҕолор кыра саастарыттан норуот инструменнарыгар, аан дойду үгүс классика буолбут матыыптарын айбыт фортепиано курдук уустук инструменнарга дьарыктаналлар.

Онтон хорга ыллыыр оҕолор дьарыктарын эти-сиинии уһугуннарыыттан саҕалыыллар. Эттэрэ-сииннэрэ уһуктубутун кэнниттэн куолаһы уһугуннарыы саҕаланар.

30 сыл устата оҕолору ыллыырга үөрэтэн кэлбит Надежда Попова саҥа саҕалааччы кырачааннары эрчийэ сылдьар. Бу оҕолор быйылгы үөрэх дьылыттан оҕо искусствотын оскуолатыгар киирэн хорга ыллыырга үөрэнэллэр, куоластарын арыйарга дьулуһаллар.

Надежда Попова, Дьокуускай куорат 1-кы №-дээх оҕо искусствотын оскуолатын хор үөрэҕин учуутала: «Хорга биһи 6,5 – 9 саастарыгар диэри оҕолору ылабыт тоҕо диэтэргин үөрэхпит уһун - 8 сыллаах. Үөрэхпит биһиэнэ «Хоровое пение» диэн ааттанар. Маҥнайгы кылааска киирэр оҕолору ылабыт уонна 8 сыл тухары эрчийэбит. Бүтэрдэхтэринэ оскуоланы бутэрбиттэрин туоһулуур диплом биэрэбит».

Оҕолор олох кыра саастарыттан музыка алыптаах эйгэтигэр сыстаннар, 8 сыл устата үөрэнэн хас да инструмены толору баһылаан тахсаллар. Биир эрэ дьарыкка буолбакка хас да көрүҥҥэ тэҥинэн үөрэнэллэр.

Айсена Пестрякова, Дьокуускай куорат 1-кы №-дээх оҕо искусствотын оскуолатын 2-с кылааһын үөрэнээччитэ: «Мин манна кэлэммин хоровое пение, фортепиано, сольфеджио уонна слушание музыки дьарыктарыгар сылдьабын».

Бу курдук, оҕолор күннэтэ орто оскуола үөрэҕин таһынан искусство оскуолатыгар кэлэн кэрэҕэ, сырдыкка, үрдүккэ талаһаллар. Музыка алыптаах эйгэтигэр улааталлар. Илиилэрин-тарбахтарын сайынаран эргиччи уһулуччулаах, бары өттүнэн талааннаах буолаллар.