Буойун-поэт Василий Рожин мунньуллубут хоһоонноро хомуурунньук буолан таҕыста

Саха  тыйаатырын артыыстара Василий Рожин хоһооннорун ааҕаллар. Анал байыаннай дьайыыга баҕа өттүнэн баран кырдьык иһин киирсэн олоҕун толук уурбут, "Эр санаа" уордьан уонна "Хорсунун иһин" мэтээл кавалера. Буойун-поэт "Уот сүрэх", "Оставляя белый след" поэзия хомуурунньуктарын сүрэхтэниитэ буолла. 

Евгения Рожина, Василий Рожин балта: «Биһиги ийэбит да аҕабыт да өттүнэн суруйар, уруһуйдуур, айар дьон бааллар».

Буойун киһи ийэтин сүрэҕэ долгуйара, дууһата кыланара чахчы. Түүннэри-күнүстэри улахан уолун туһунан сурахтары күүтэрэ. Төһө да ыар кэмнэр аасталлар Василий дьиэ кэргэнэ үтүө аатын үйэтитэргэ, суруйан хаалларбыт айымньыларын таһааттарарга дьаныһаллар.

Людмила Рожина, Василий Рожин ийэтэ: «Хоһоон соруйдахтарына 4 устуруокалаах хоһоону үөрэ-көтө суруйааччы уонна прозаҕа даҕаны киириэн сөптөөх этэ, ол гынан баран кэлин хоһоонноругар болҕомто уурбута».

Биллэн турар уоттаах кыргыһыы хонуутугар илэ бэйэтэ сылдьыбыт киһи суруга-бичигэ ураты майгылаах, өрө күүрүүлээх буолар. 2017 сыллаахтан айар үлэннэн дьаныардаахтык дьарыктаммыта. Эдэр литератордар сэбиэттэригэр киирбитэ, элбэх куонкурус кыайыылааҕа, лаурета буолбута.

Гаврил Андросов, СӨ суруйааччыларын сойууһун бэрэссэдээтэлэ: «Кини лириката эр киһилии, хорсун хоодуот. Хоһоонноругар дойдуну көмүскүүр, ол туһугар үлэлиир өй-санаа баара биллэр».

Бэйиэт кылгас олоҕун устата 1500 кэриҥэ хоһоону кумааҕыга тиһэн хаалларбыт. Олортон үгүс айымньыта "Уот сүрэх" уонна "Оставляя белый след" хомуурунньуктарга киирдилэр.

Василий Рожин айар-үлэтэ өссө даҕаны өр сыллар тухары аар-саарга аатыра, ааттана туралларын туһугар чугас дьоно, доҕотторо үлэлиэхтэрэ. Өссө даҕаны айан-суруйан хаалларбыт хоһоонноро ааҕааччы киэҥ араҥатыгар тахсыахтара.