Уруһуйдьут-модельер Августина Филиппова үбүлүөйдээх айар киэһэтэ буолла

Худуоһунньук-модельер, Саха өрөспүүбүлүкэтин култууратын үтүөлэээх үлэһитэ, «Хотугу сулус» орден кавалера Августина Филиппова 75 сааһыгар анаммыт үбүлүөйдээх тэрээһинин күнэ Сэмэн уонна Софрон Даниловтар ааттарынан Духуобунас киинигэр айар үлэлэрин көрдөрөр аныгы кэм сиэринэн виртуальнай быыстапкатыттан саҕаланна, бу манна кэлбит киһи Августина Николаевна үлэлэрин интерактивнай дуоскаҕа икки тылынан доҕуһуоллаах 3Д хаартыскалары эргитэ сылдьан көрүөн сөп буолла 

Александра Алексеева Сэмэн уонна Софрон Даниловтар ааттарынан Духуобунас киинин дириэктэрэ: «Бу быыстапка сүрүн сыала-соруга – кини айымньытын, кини айар үлэтин үйэтитии, кэлэр кэнчээри ыччакка тириэрдии уонна оттон бука барыта бу кэрэҕэ дьулуһар, кэрэни сэргиир дьоҥҥо сүрдээҕин диэн бу үйэлээх бэлэх буолла диэн сыаналыыбын уонна саныыбын».

Бу иннинэ ааспыт сылга Августина Николаевна үбүлүөйүгэр анаммыт айар киэһэлэр Дьокуускай куоракка иккитэ төхтөрүйэн туран тэриллибиттэрэ. Төрөөбүт дойдутугар буолбут тэрээһин ураты долгутуулаахтык ааста диэн бэйэтин санаатын үллэһиннэ.

Августина Филиппова худуоһунньук-модельер, СӨ култууратын үтүөлэээх үлэһитэ: «Долгуйабын аҕай биллэн турар, бары миигин билэллэр хайдах улааппыппын, хайдах манна эдэр сааспар сылдьыбыппын, үлэлээбиппин-хамсаабыппын. Бу билиҥээҥҥэ дылы үлэлии-хамсыы сылдьабын, онон хайдах эрэ ордук истиҥ-иһирэх буолар буоллаҕа дьи».

Бу курдук айылҕаттан бэриллибит сүдү дьоҕурдаах киһибит айбыт уобарастарын көрүү киэһэтэ ымпыгар-чымпыгар диэри Духуобунас киинин исписэлиистэринэн толкуйданан улуус эдэр дьонун көмөтүнэн  уораҕай  киэҥ саалатыгар толору көрөөччүнү муста, манна сээркээн сэһэнтэн саҕалаан Чолбон, Чысхаан, Муус кудулу оннооҕор Александр Пушкин остуоруйатын дьоруойдара кытары сааланы биир кына хаамтылар сыанаҕа таҕыстылар, Августина Николаевна үөрүүтүн үллэстэ үөлээннээхтэрэ, аймах билэ дьоно, атастара доҕотторо, биир идэлээхтэрэ ыраахтан чугастан кэллилэр.

Елизавета Слепцова А.Н. Филиппова оҕо сааһын дьүөгэтэ: «Олох наһаа үчүгэйдик уруһуйдуур. Уруһуйун олох уочараттыы-уочараттыы былдьаһыгынан ылар этибит. Онон оҕо эрдэҕиттэн сүҥкэн талааннаах уруһуйдьут буолара эрдэттэн биллэр этэ. Уонна наһаа үчүгэйдик остуоруйа айан, тупсаран кэпсээччи, үчугэйдик ыллыыр, үҥкүүлүүр».

Айар киэһэ түмүгэр Өрөспүүбүлүкэ биир бөдөҥ биллэр учуонайа хотугу аҕыйах ахсааннаах омуктар кыһалҕаларын дириҥэтэн үөрэтэр социолог, Артикатааҕы култуура уонна искусство институтун уонна Хотугулуу илиҥҥи федеральнай универститет профессора Ульяна Алексеевна Винокурова Августина Николаевна эргиччи дьоҥуругар олоҥурдахха кини концепутальнай модельер буолар диэн бигэргэттэ, өссө да саҥаны айыа-тутуо дьонун салгыы үөрдүө диэтэ.

Ульяна Винокурова хотугу норуоттар олохторун-дьаһахтарын үөрэтэр учуонай, ХИФУ уонна АГИКИ профессора: «Августина Николаевна Филиппова диэн биһиги уһулуччулаах концептуальнай модельербыт диэн сыаналыахха наада. Концептуальнай модельер диэн ол аата сүрүн ытык өйдөбүллэри, санаалары таҥас нөҥүө ону илэ хаамтаран көрдөрөн айар дьоҕурдаах уһулуччу кыахтаах киһи ааттанар».

Харах халтырыйар кэрэ киэһэтигэр тиксибит биир дойдулаахтара Августина Николаевнаҕа тэрээһин түмүгэр сүһүөхтэригэр туран эрэ  ытыстарын  тыаһын бэлэхтээтилэр. Бу буоллаҕа бар дьон-махталын тапталын дьиҥнээхтии сыралаах үлэнэн ситиһии диэн.