Искэҥи эмтиир өрөспүүбүлүкэтээҕи киин тутуута түмүктэннэ

Онкоцентр Саха сирин олохтоохторун уонна онколог быраастар саамай күүтүүлээх балыыһалара, өр сыллар устата иитиэхтээн кэлбит ыра санаалара. Кииҥҥэ элбэх үрдүк таһымнаах аныгы технология тэрилэ барыта биир кэлимҥэ киирэн үлэлиэхтээх. Манна биир сылга ортотунан 4 тыһыынча уустук эппэрээссийэ оҥоһуллар буолуоҕа, билигин бу көрдөрүү 2 тыһыынчаҕа тэҥ. 

Феодосия Иванова, СӨ онкодиспансерын эмтээһиҥҥэ салаатын салайаччы: «Диагностика өттө сайдыаҕа, урут өрөспүүбүлүкэҕэ суох оборудования кэлэр, түргэнник быһаарар, эмтиир. Уонна хирургическай эмтээһин өттүтүгэр хамсааһын барыа, холобур урут сылга 2500 эппэрээссийэ оҥорор буоллахпытына, бу саҥа кииҥҥэ киирдэхпитинэ 4500 үрдүк таһымнаах эппэрээссийэлэри бары органнарга оҥорор буолуохпут».

Өрөспүүбүлүкэтээҕи онкологическай киин симиэнэҕэ 210 киһи сылдьар поликлиникалаах, ол эбэтэр сылга манна 50 тыһыынча ыарыһах кэлэн көрдөрүнэн ааһыан сөп. 200 кэриҥэ киһи сытар эмтэнэр стационардаах. Ол эбэтэр онкодиспансер саҥа дьиэтэ 4 блоктан турар: бастакыга диагноз чопчу туруорар оборудованиенан хааччыллыбыт поликлиника, иккискэ эппэрээссийэ оҥорор 6 хос, түөрт интенсивнай терапия палатата бааллар, онтон үһүс, төрдүс блоктарга 180 куойкалаах стационар буолар.

Ол курдук быраастар дойдубут киин куораттарыгар баран анаан-минээн үөрэммиттэрэ, онон каадырадарынан хааччыллыы толору быһаарыллан турар.

Татьяна Николаева, СӨ онкодиспансерын кылаабынай бырааһа: «Подготовка кадров идет давно, с 2017 года. Штатное расписание утверждено. Мы готовы войти в новый центр и оказывать медицинскую помощь по профилю онкология».

Бүгүҥҥү күҥҥэ Саха сирин үрдүнэн уопсайа 13 тыһыынчаттан тахса киһи онкологтарга учуокка турар. Өрөспүүбүлүкэҕэ саамай тэнийбит онкологическай ыарыыларынан тыҥа, түөс уонна быар рага буолаллар. Биир үксүн ыарахан ыарыыны олох эрдэттэн буллаха эмтэнии ситиһиилээх буолар. Онон диагностиканы эрдэттэн быһарыы сүрүн болҕомтону ылар.

Феодосия Иванова, СӨ онкодиспансерын эмтээһиҥҥэ салаатын салайаччы: «Саҥа рентген-хирургическай отделение арылынна уонна лабараторияҕа саҥа оборудованиялар кэллилэр».

Киин үлэҕэ киирдэҕинэ сытан эмтэнэр куойка ахсаана элбээн 215 тэҥнэһиэҕэ. Оттон поликлиникатыгар саҥа кабинеттар аһылыннылар, штатака эбии идэлээх үлэһит, ол курдук пульмонолог, эндокринолог, онкопсихолог баар буолуохтара. Сотору кэминэн киин аанын тэлэччи аһан бастакы пациеннар саҥа үрдүкү таһымнаах үрдүк хаачыстыбалаах медицинскэй өҥөнөн туһананр кыахтаныахтара.