"Илии сылааһа" Өрөспүүбүлүкэтээҕи курэхтэһии саҕаланна

3 төгүлүн Өрөспүүбүлүкэтээҕи иистэнньэҥнэр күрэхтэрэ саҕаланна. Анал байыаннай дьайыыга сылдьар уолаттарбытын өйүүр суолталаах куонкуруска номнуо үгүс сайаапка киирдэ. Күрэх сүрүн сыала-соруга, балаһыанньата оннуннан хаалла, арай кыра кэккэ уларыйыылар киирдилэр диэн “Илии сылааһа” куонкуруһу тэрийээччи Ирина Саввина кэпсээтэ.

Ирина Саввина, «Илии сылааһа» волонтер иис хамсааһынын салайааччыта: «Маҥнайгы сүһүөхпүт түмүгэ олунньу 7 күнүгэр. 25 чыыһылаттан сайаапка биэрбит дьоҥҥо матырыйаал түҥэтиэхпит. Куонкуруспут 30 чыыһылаттан саҕаланыаҕа. Куонкуруспут 3 төгүлүн ыытыллар оҕолорбутун таҥыннараары диэн. Элбэх филиаллардаахпыт, олор базаларын тупсараары ыытабыт».

Манна даҕатан этэр буоллахха, “Илии сылааһа” Саха сирин ийэлэрин, эбээлэрин түмэр үтүө санаа хамсааһына анал байыаннай дьайыы саҕаланыаҕыттан тэриллэн үлэлиир. Күн бүгүн манна үгүс ийэ дойдуларыран көмүскүү сылдьар байыастарбыт чугас дьонноро тустаах хамсааһыҥҥа бааллар. Күннэтэ кэлэн илиилэрин сылааһынан уолаттарга таҥас тигэллэр.

Онон бу үтүө санаалаах далбардар көҕүлээн, ыытар куонкурустара икки өттүтэн улахан суолталаах. Былырыын күрэххэ 10-тан тахса түмсүү кыттыыны ылбыт эбит буоллаҕына быйыл номнуо 50-тан тахса сайаапка киирбит. Ол курдук, кыттааччылар биир байыас толору комплегын тигиэхтээхтэр: тактическай ырбаахы, футболка, ыстаан, ис таҥас, снуд, бэргэһэ уонна бу куонкурус кыһын ыытыллар буолан халыҥ сон. Маны барытын түмсүү иистэнньэҥнэрэ дьүүллүөхтэрэ, кыайыылаахтары бигэргэтиэхтэрэ

Айталина Рожина, куонкурус дьүүллүүр сүбэтин чилиэнэ: «Куонкуруска дьүүллүүр сүбэ буолабыт. Тигии хаачыстыбатын ирдиибит ону таһынан тас көрүҥүн эмиэ көрөбүт».

“Илии сылааһа” Өрөспүүбүлүкэтээҕи иистэнньэҥнэр курэхтэригэр кыттыан баҕалаахтар сайаапкаҕытын тохсунньу 29 күнүгэр диэри биэриэххитин сеп. Олунньу 10 күнүгэр бүтэһик түмүктэр тахсыахтара.