Дьокуускайга сиртэн салайыллар көтөр ааллар быыстапкалара турда

Ырааҕы көтөр уонна ыйааһыны иилинэр кыахтаах. Бу саха инженердэрин саҥа арыйыыта - FPV диэн экрана харахха ачыкы курдук кэтиллэн салайыллар дрон. Экшн устууларга анаммыт буолан олус түргэн уонна салайыыга судургу. Таҥан таһаарааччылар кэпсииллэринэн масыынаны курдук салайыллар. 10 килэмиэтир ырааҕы көтөр буолан чуҥнааһыҥҥа туттуллар итиэннэ араас хабааннаах байыаннай эпэрээссийэлэри оҥорууга.

Ыҥырыллар аата "Одун": «Барытын онтон мантан сакаастаан бэйэбит дьоно маннык хомуйуохтарын сөп. Биһи подразделениябытыгар маннык хомуйар уолаттар эмиэ бааллар. Биир олохтоох, манна дэлби тэптэрэр тэрил иилэн баран өстөөххө тиийэн тоҕо түһэр».

Бу дроннары олохтоох инженердэр туһааннаах сапчаастарын араас сиртэн сакаастаан бэйэлэригэр сөптөөх гына таҥан таһаарбыттарын кэннэ 3Д-принтер көмөтүнэн ситэрэн биэрэллэр. Холобура, бу көстөр күөх өҥнөөх туттаһык эмиэ олохтоох оҥорон таһаарыы. Маны сэргэ принтергэ укол эмин харайар иһиттэри, тарбах протезтарын,  дрон алдьаммыт чаастарын оҥороллор. Бу тэриллэр бары холоон көрүүнү ааспыттар, олус бөҕөлөр уонна тымныыны тулуйумтуолар диэн сыаналаммыттар. 

Ыҥырыллар аата "Зевс": «Дроннарбыт алдьаннахтарына мин сапчаастарын оҥоробун. Холобур, наадалаах сапчааһы моделируйдуубун, ол кэннэ принтерга көһөрөбүн уонна бэчээттээн барабын».

Сиртэн салайыллар тэриллэри өрөмүөннээһин уонна саҥа кэлбиттэри настройкалааһын үгүс сатабылы эрэйэр. Онон инженернэй күүс бу хайысхаҕа  сайда турар.

Ыҥырыллар аата "Сапсан": «Дрон программируйдуубун, настройкалыыбын сөпкө үлэлиирин курдук. Бэлэм дроннары бэйэбит син биир турукка киллэрэбит».

Онтон бу дрон үлэтин кэһэр тэрил. Ыраахтан туран тиэхиникэни суулларар прибор киһи доруобуйатыгар олус буортулаах. Сардаҥа күүһүнэн үлэлиир буолан охсуута улахан, ону Саха сирин инженердэрэ дьайар күүһүн кыччатары тобулбуттар.

Ыҥырыллар аата "Арбалет": «Экранируйдаан биэрэбит уонна эбии таһынан фольга матырыйаал иилэн биэрэбит, оччоҕуна туттар киһи тыктарара кыччыыр. Бу 10 ватт күүстээх, аныгылар олох да 50 ватт буолаллар».

Быыстапкаҕа маны сэргэ инженернэй күүстэр историяларын кэпсиир экспонаттар көрдөрүүгэ турдулар.