Арассыыйа мин остуоруйам түмэл аахсыйа тэрийдэ

12 саастаах Коля Терёшкин Арассыыйа остуоруйатын көрө-истэ кэллэ. Кини Дьокуускай куорат №17 оскуолатын 6-с кылааһын үөрэнээччитэ. Ийэтэ уола кыра сааһыттан остуоруйаны интэриэһиргиирин билэн, араас сирдэргэ сырытыннарар. Дьиэ кэргэн аахсыйата ыытылларын истэн, куораппытыгар баар биир улахан түмэли буор босхо кэрийэр кыахтаннылар. Хас биирдии оҕо дойдутун уруккутун, билиҥҥитин билэр уонна кэскилин сабаҕалаан көрөр кыаҕын кыра сааһыттан сайыннарыахтаах диэн Васёна Устинова үллэстэр.

Васёна Устинова, Дьокуускай куорат олохтооҕо: «Уолум улаатан эрэр, ол иһин остуоруйаны биллин диэн манна көрө кэллибит. Киһи элбэҕи билэр эбит. Аныгы интерактивнай саалалаах буолан киһи өйүгэр киирэр эбит».

Экскурсия Саха сирин остуоруйатыттан саҕаланна. Аҕыйах ахсааннаах норуоттар төрүттэрэ, түҥ былыргы Саха омук култуурата уонна оччотооҕу туттар маллара улахан дуоскаҕа таҕыстылар. Аны тиэхиньикэ көмөтүнэн чопчу кэрэхсээбит остуоруйа хаартыскаларын эбии көрүөххүн сөп. Экскурсия түмүгэр Коля тугу сэҥээрбитин кэпсээтэ.

Коля Терёшкин, Дьокуускай куорат 17 №-дээх оскуолатын 6-с кылааһын үөрэнээччитэ: «Мне здесь очень понравилось. Больше всего понравился рассказ про князя Олега, как он повесил свой щит в Византии, что означало его победу над ними».

Рюриковичтар династияларын саалатыгар киирбит киһи остуоруйа оччотооҕу чахчытыгар абылатан, киирэн хаалар. Киһи манна кэллэҕинэ, оччоттон баччаҕа диэри төһө элбэх уларыйыы барбытын анаалыстаан көрөр. Ордук оскуола оҕолоро улахан интэриэһи уураллар.

Историческай факультет аспираана бу түмэлгэ экскурсоводунан үлэлиир. Дойду остуоруйатын үөрэтиигэ билигин болҕомто улаатан, дьон сырыыта элбээтэ. Онон билиэн баҕалаах, интэриэстээх дьоҥҥо Анатолий бары билиитин ууран туран кэпсиир.

Анатолий Семёнов, "Арассыыйа - мин устуоруйам" историческай паарка экскурсовода: «Дьокуускай куорат олохтоохторо, ыалдьыттара кэлэннэр биһи Арассыыйабыт остуоруйатын билэн бараллар. Төһө да интириэһиргээбэтилэр да, син биир туох эрэ хаалан барар. Биһи дойдубут олус баай остуоруйалаах, ону билбит ордук».

Арассыыйа - мин остуоруйам историческай түмэл арааһынай дойду таһымыгар бэлиэтэнэр күннэри үйэтитэн тэрээһин оҥорор. Холобур бу күннэргэ Ленинград блокадатын 80 сылыгар аналлаах саала тохсунньу 26 күнүттэн олунньу 25 күнүгэр диэри үлэлиэҕэ.