Дьиэ баһаарын утары үлэ барар

Статистика хобдох сыыппырата көрдөрүүтүнэн үгүс баһаардар элбэх кыбартыыралаах мас дьиэлэргэ тахсаллар. Онон бу эйгэ үлэһиттэрин сүрүн болҕомтото - маннык дьиэлэргэ. Күн бүгүн ыксаллаах быһыы майгы  министиэристибэтин баһаары утары сулууспата Клара Цеткин аатынан уулуссаҕа профилактическай - сэрэтэр үлэтин ыытта. Инспиэктэр кыбартыыраларынан сылдьан, дьоҥҥо иһитиннэрэр суруктары итиэннэ инструктаж ыытта.

Манна даҕатан эттэххэ, статистика чахчыта туоһулуурунан дьиэҕэ -уокка тахсар баһаардар инникки күөҥҥэ тураллар. Ол курдук, былырыын Өрөспүүбүлүкэ үрдүнэн уопсайа 1826 баһаар туран, 236 киһи олоҕо баһаарынайдарынан быыһаммыт, маныаха хомойуох иьин 69 киһи суорума суолланан, онтон иккитэ оҕо. Итиэннэ 80 киһи араас таһымнаах эчээйиилэри ылбыт, онтон 13 оҕолор. Быйылгыга киирэр буоллахха, 2024 сыл саҕаланыыта сыыппыра бу курдук. 

Михаил Булкин, СӨ ЫБММ баһаары умулларар сулууспатын салайааччытын солбуйааччы: «Быйыл Саха сиригэр уопсайынан 80-тан тахса баһаар бэлиэтэннэ. Ону сүрүн баһаардар буолар сирдэрэ – чааһынай дьиэ. Баһаарынай сулууспа үлэһиттэринэн уопсайа 40 киһи быыһанна баһаартан. Хомойуох иһин баһаарга 1 киһи былдьанна уонна 1 киһи эчэйии ылла».

Тустаах эйгэ үлэһиттэрэ тоһоҕолоон этэллэринэн баһаар тахсар сүрүн төрүөттэрэ - уот ситимнэрэ уонна ититэр оборуудабанньалары сыыһа-халты туттууга сытар.

Евгений Габышев, ЫБММ Саха сиринээҕи салалтатын баһаартан сэрэхтээх буолуу судаарыстыбыннай сулууспатын сэрэтэр үлэҕэ салаатын инспиэктэрэ: «Үксүн баһаар үөскүүр төрүөтэ уот ситимиттэн, уоту туттар тэриллэртэн умайыы уонна оһох оттуутун быраабылатын тутуспат буолуутуттан. Холобура бу дьиэҕэ уот ситимин кэһиилэрэ боруобаттара тымныы эриллиинэн уонна лаампа плафона суох турар. АДПИ турар эбит. Хоруобуйаҕа тахсар сир сабыллан туруохтаах үргүөр суох буоларын курдук уонна подъездка сээкэйдэр туруо суохтаахтар».

Баһаары умуулларардааҕар, сэрэтэр ордук диэн санаанан салайтаран инспиэктэрдэр маннык тэрээһиннэргэ күн көтө-көтө тахсаллар. Маныаха Дьокуускай куоракка эрэ буолбакка, куорат таһынааҕы нэһилиэктэргэ эмиэ рейдэлэри ыыталлар. Көдьүүстээх үлэ түмүгэ Дьокуускай эркин биллибит.

Евгений Габышев, ЫБММ Саха сиринээҕи салалтатын баһаартан сэрэхтээх буолуу судаарыстыбыннай сулууспатын сэрэтэр үлэҕэ салаатын инспиэктэрэ: «Статистикабыт аллараа түспүтэ бэлиэтэннэ. Былырыын 30-тан тахса баһаар буолбут буоллаҕына, быйыл – 24».

Оттон күн бүгүҥҥү рейдэҕэ уопсайа 10-тан тахса кыбартыыраҕа сэрэтэр-профилактическай үлэ ыытыллан, үгүс киһи саҥаны-биллэ көрдө, инструктаж ааста.