Чэпчэки атлетикаҕа доруобуйаларыгар хааччахтаах дьоҥҥо чемпионат буолла

Чурапчыттан сылдьар 16 саастаах Мичийээнэ Павлова 60 миэтирэҕэ сүүрдэ. Сүүрүүнэн дьарыктанан саҕалаабыта сылтан эрэ орто. Бу кылгас кэм иһигэр бу көрүҥү таптаан, ис иһиттэн сөбүлээн дьарыктанар. Өрөспүүбүкэ таһымнаах күрэххэ кытта кэлбитим - кыайыы, ол иһин миэстэлэспэт да түгэммэр хомойбоппун диэн үллэстэр.

Мичийээнэ Павлова, С. А. Новгородов аатынан Чурапчы орто оскуолатын 10-с кылааһын үөрэнээччитэ: «Тренердэрим эбилибиккин диэтилэр. Дьиэбэр мэлдьи дьарыктанабын. Түмүккэ кэлэн тохтоон хааллым, куттанан хаалбыппын дуу. Билигин үчүгэйдик сүүрдүм дии саныыбын».

Спортсменнар хааччахтарын туоһулуур барыыс суруйан биэрбит ыспыраапкалаах кытыннылар. Уопсайа 79 улахан киһи уонна 52 оҕо. Икки күн устата сүүрүүгэ 4 дистанциянан уонна ядро быраҕаһааныгар кытыннылар.

Ыраах Өлөөн эбэҥки национальнай улууһуттан кэлэ сылдьар хамаанда 4 оҕону кытыннара аҕалла. Бу сыл сүүрүүгэ бэтэрээннэргэ бастаабыт Николай Семенов сиэнинээн кытынна. Кырачаан кыыс хараҕынан инбэлиит буолат, эһэтин кытта илиилэрин быанан баайан сүүрдүлэр.

Николай Семёнов, Өлөөн улууһун олохтооҕо, СӨ спорт маастара: «Оҕолору кытыннараары кэллибит. Кинилэр 60 миэтэрэҕэ сүүрүөхтэрэ. Бастакы кыттыыбыт буолар, ыарахан дииллэр. Илдьэ, көрө-истэ сылдьыахха наада. Бастакы кыттыыбыт буолан хайдах буоларын көрүөхпут».

Аҕыйах хонуктааҕыта буолан ааспыт өрөспүүбүлүкэ чөмпүйүнээтигэр доруобай дьоҥҥо бастаабыт Саргылаан Семенов элбэх дьону сөхтөрдө. Төһө даҕаны доруобуйатынан хааччахтаах буоллар, спортка таптал, санаа күүһэ хайа баҕарар ыарыыттан үрдүгүн бэлиэтээтэ. Олунньу ыйга Арассыыйа кубогар кытта бараары бэлэмнэнэр. Бу күрэххэ кини судьуйа быһыытынан үлэлээтэ.

Саргылаан Семёнов, Аан дойду таһымнаах спорт маастара: «Спортунан дьарыктанын диэн дьоннорго этиэхпин баҕарабын. Киһи доруобуйатын туругурдар уонна киһи бэйэтигэр эрэллээх буолар. Спортунан да буолбакка физкультуранан дьарыктанын. Доруобуйанан хааччахтаах дьоннор бэринимэҥ уонна бэйэҕитигэр эрэнэн баран инники диэки баран иһиҥ».

Ааспыт сыл Амма улууһугар "Дьулуур" диэн адаптивнай көрүҥнэр спартакиадалара ыытыллыбыта. Онтон ыла элбэх киһи бэйэтигэр элбэх эрэли ууран, бүгүн үгүс баҕалаах бастакытын күрэхтэһэ кэллэ.

Гаврил Мохначевскай, СӨ физическэй култуура уонна спорт миниистирин солбуйааччыта: «Доруобуйалара хааччахтаахтар спортка сыстан, бэйэлэрин кыахтарын таба туһанан, эттэрин хааннарын эрчийэннэр уонна спорт көмөтүнэн дьоннору кытта тапсар буолаллар».

Кимтэн да итэҕэс санаммакка, санаа күүһүнэн, сырдык баҕанан салайтара сылдьар сырдык дьон бэйэлэрин икки ардыларыгар саҥа доҕотторун уонна биир санаалаахтарын буллулар.