Бэйдиэ сылдьар ыт ахсаанын хонтуруоллуур рейдэлэр бараллар

Маннык нэдиэлэ ахсын куорат управатын үлэһитэ, ветеринария департаменын инспиэктэрэ, полиция бэрэстэбиитэлэ кыттыылаах рейдэ ыытыллар. Бу сырыыга Октябрьскай уокурук салалата кинилэргэ киирбит үҥсүүнэн чааһынай тэрилтэҕэ - базаҕа кэлэн хаһаайыныгар административнай кэһиигэ боротокуол толоро кэллилэр. База баар хас даҕаны ыт бу эргин олорор олохтоохторго кутталы үөскэтэринэн хас даҕаны үҥсүү киирбит.

Роман Сидоров, Дьокуускай куорат Октябрьскай управатын үлэһитэ: «Манна олорор олохтоохтон үҥсүү киирбитэ. Бу база хаһаайына ыттары ыытар диэн. Департамены кытта хас нэдиэлэ аайы уокуруктары кытта рейдэлэр буолаллар. Сыала соруга – хаһаайыттар ыттарын хайдах көрөллөрүн иитэллэрин көрөбүт».

Бэлиэтээн эттэххэ, бу соторутааҕыта биир ый аннараа өттүгэр ахсынньы 22 күнүгэр СӨ административнай быраабы кэһии кодексыгар уларыйыы киирэн турар. Ол курдук, чуолаан дьиэ кытылын иитэр-харайар быраабылалары кэһии иһин ыстыраап үрдээтэ. Аҥардас бу ый бастакы нэдиэлэлэрин түмүгэр номнуо 22 рейдэ ыытыллыбытыгар 7 быраабыланы кэһии тахсыбыт, ол иһин сэттэ хаһаайын сэттэ тыһыынча солкуобайга ыстарааптаммыт.

Анна Васильева, СӨ ветеринарияҕа департаменын судаарыстыбыннай инспиэктэрэ: «2023 сыл ахсынньы 22 күнүгэр СӨ административнай быраабын кэһии кодексыгар уларыйыы киирдэ. Урут быраабы кэстэхтэринэ бастаан сэрэтии ылар буоллахтарына, билигин 1000 – 3000 тыһ. солк. ыстырааптаналлар, иккистээн түбэстэхтэринэ 3000-5000 тыһ. солк. ыстырааптаналлар».

Маныаха дьиэ кыылын иитэр-харайар быраабылалар ирдэбиллэринэн ыттаах хаһаайын ытын булгуччу быалаах күүлэйдэтиэхтээх, босхо ыытыа суохтаах, оҕо оонньуур былаһааккатыгар күүлэйдэтэрэ бобуллар, ыты 35 см. үрдүк буоллаҕына томторуктаах буолуохтаах уонна хас биирдии хаһаайын ыта дьоҥҥо-сэргэҕэ кутталы үөскэппэтин хааччыйыахтаах. 

Олохтоохтортон күннэтэ сайаапка киирэр, ардыгар уоннуу ардыгар, биирдии-икилии. Куорат эргинээҕи бөһүөлэктэр эмиэ көхтөөхтүк үлэлэһэллэр. Ааспыт нэдиэлэ түмүгүнэн 40-тан тахса бэйдиэ сылдьар ыты туппуттар. Ыты тутууга куорат иһигэр 6 биригээдэ үлэлиир. Бүгүҥҥү күҥҥэ ыттар приюттара 900-тэн тахса ыт иитиллэн турар. Маны тэҥэ куорат кэккэ оройуоннарыгар бэйдиэ сылдьар ыт кыһалҕата син биир сытыытык турар. Тымныы турар буолан бэйдиэ сылдьар ыт ахсаана аҕыйах, мантан саас сылыйдаҕына өссө элбиэхтэрэ турдаҕа.