Бастакы Президент Михаил Николаев аатынан уулуссаҕа бастакы дьиэ олоххо киирдэ

Саҥа дьиэ күлүүстэрин туттарыах иннинэ сахалыы сиэринэн сыт таһааран аал уот оттуллар, инники уйгулаах олох иһин айах тутуллар. Бүгүн суолталаах күн - маҥнайгы Президент Михаил Николаев аатынан проспект диэн аадырыстаах маҥнайгы дьиэ олоххо киирэр бэлиэ күнэ. Малааһыннаахтарга онон икки бүк үөрүү.

16 мэндиэмэннээх 134 кыбартыыралаах саҥа тутуллан үлэҕэ киирбит дьиэ Михаил Николаев аатынан проспект 2/3 диэн нүөмэрдээх буолла. Онтон күлүүһү туттарыы дьоро тэрээһинигэр судаарыстыба өйөбүлүн туһалан олорор усулуобуйаларын тупсарбыт 59 ыал кытыннылар.

Майя уонна Петр Цойдар саҥа кыбартыыраларын сыныйан көрөллөр уонна сырдык киэҥ эбит диэн астыналлар. Кинилэр оҕолоругар анаан бу дьиэни ылбыттар. Маныаха судаарыстыбаттан көрүллэр өйөбүлү бүтүннүү туһаммыттар. 

Пётр Цой: «Дьиэбитин уһук илин ипотекатынан ыллыбыт. Бастакы төлөбүргэ ийэ хапытаалынан тутуннубут. Михаил Ефимович Николаев аатынан бастакы киирбит дьиэ буларыттан киэн туттабыт, тоҕо диэтэргэ Михаил Николаевич Саха сирин дьонноругар элбэх үтүөнү, үчүгэйи оҥорбут киһи буолар».

Ааспыт сыл саҕаланыаҕыттан уһук илин ипотекатын Саха сиригэр 9 тыһыынча киһи туһаммыт. Ол эбэтэр 47 миллиард суумма бэриллибит. Бу ипотеката баар буолан тутуу Өрөспүүбүлүкэҕэ тэтимнээхтик ыытыллар. Ааспыт сылга Саха сиригэр хаһааҥҥытааҕар да элбэх дьиэ үлэҕэ киирбит. Ол курдук 705 м² тыһ. миэтэрэ иэн. Маннык көрдөрүү сэбиэскэй саҕаттан ситиһиллэ илигэ.

Евгений Афанасьев, СӨ тутуу миниистирин солбуйааччы: «Биһи Ил Дархаммыт сорудаҕынан былырыын сыл бүтэһигэр бу Автодорожнай уулусса Михаил Ефимович Николаев, биһи бастакы Президеммыт аата иҥэриллибитэ. Бу проспекпытыгар биһиэхэ 2024 сылга аан маҥнайгы дьиэ үлэҕэ киирдэ. 123 кыбартыыралаах, ол иһигэр биһиэхэ бу дойдубут Президенын өҥөтүнэн льготнай быраграамаларынан, уһук илин ипотеканан туһананнар 59 ыал олорор усулуобуйатын тупсарынна».                                               

Онтон Михаил Ефимович аатынан проспект оройуонун салгыы күүскэ сайыннарар сорук турар. Ол курдук бу түөлбэҕэ сотору кэминэн кинопавильон, устудьуоннар кампустара уонна Медицинскэй институт саҥа дьиэтэ баар буолоуҕа. Онон бу куорат биир тэтимнээххтик сайдар оройуона.

Артём Набережный: «Мин санаабар бастакы Президеммыт аата үйэҕэ хаалыахтаах. Мин бу түөлбэҕэ улааппытым, онон үөрүүлээх түгэн. Биһиги уһук илин ипотекатынан ыллыбыт 2 хостоох кыбартыыраны. Билигин 1 хостооххо олорон баппаппыт, уолбут туспа хостонуон баҕарар».

Ааспыт сылга Куорат Дуумата Автодорожнай уулуссаны бастакы Президент аатынан уларытыыгар ылыммыта. Онтон билигин Михаил Николаев аатынан проспект судаарыстыбаннай реестрга киирдэ.