Олохтоох оҥорон таһаарыы сайдар

22 саастаах Евгений Бесчетников бэйэ аһын оҥоруунан дьарыктаммыта иккис сыла. Кини минньигэс десертэрэ билигин өрөспүүбүлүкэ бары муннуктарын хабан атыыга бараллар. Ол иннинэ бастаан дьиэ кэргэнинэн түргэнник сиэниллэр тоҥ аһы оҥоруунан Тулагыттан дьарыктанар этилэр. Ол кэннэ туризм уонна атыы-эргиэн министиэристибэтин өйөбүлүнэн куорат киинигэр сыах арынан, кэҥээбиттэрэ.

Билигин үгүс киһи үлэ-үөрэх очуругар сылдьар буолан, түргэнник бэлэм буолар аска ордук интэриэстээх. Онон уһун болдьоххо хараллыан сөптөөх тоҥ пиццаны уонна десертэри уопсайа 1000-тан тахса өрөспүүбүлүкэ араас муннуктарыгар тиэрдэллэр. Эдэр кэскиллээх урбаанньыт дьыалатын туһунан кэпсээтэ.

Евгений Бесчетников, эдэр урбаанньыт: «Биһиги бородууксуйабыт билигин Сунтаарга, Мииринэйгэ тиийдэ. Бу биһиги ситиһиибит буолар. Онон билигин биһиги оҥорон таһаарыыбыт 20 улууска атыыланар, кыһыҥҥы кэмҥэ ыраах сытар нэһилиэктэргэ кытары тириэрдэбит».

Саха омук төрүт эмтэнэр үгэһэ билигин төптөрү сөргүтүллэн эрэр. Ол курдук отунан-маһынан араас эмтээх чэй оҥоһуллан тахсара элбээтэ. Киэҥ иэннээх Саха сирин кэрийэн, айылҕа оҥорон таһаарбыт үүнээйилэрин билим таһымыгар бигэргэтэн Марисса Кононова утумнаахтык дьарыктана сылдьар. Былыр былыргыттан уһун кырыа кыһыны саха киһитэ туораан доруобай сылдьарыгар хатарыллыбыт от-мас күүс көмө буолара.

Марисса Кононова, эдэр урбаанньыт: «Эбээм миигин ииппитэ-такайбыта уонна  оҕо эрдэхпиттэн отунан-маһынан дьарыктанарга кини сыһыарбыта. Наһаа ыарыһах оҕо этим, ону от чэйдэринэн эмтээн үтүөрдээччи. Биһиги сирбит-уоппут киэҥ онон бу салааны төһө баҕар сайыннарыахха сөп, кэҥэтэр кыах баар».

Бэйэ оҥорон таһаарыытын өйөбүлүгэр Дьокуускайга үлэлиир Аччыгый баһаар - түмэр киин. Ырыынакка улуус хаһаайыстыбалара кыттыһан, түмсэн орто сыананы тутан атыылыыллара абырал буолла. Холобур, хортуоппуй араас суорта киилэтэ 80 солкуобай.   Бу курдук бэйэ аһын-үөлүн атыылыыр хаһаайыстыбалар бэйэ-бэйэни өйөһөн бииргэ хамнаатахпытына, сайдар ыырбыт кэҥиэ диэн суолу тутуһаллар. Оттон үрүҥ аска уонна эккэ киирдэххэ, улуустартан кэлбит бородууксуйа атыыга олус түргэнник барар.

Манна куруук 22 ас оҥорон таһаарар тэрилтэ бородууксуйата кэлэр. Онон дьон сырыыта үгүс. Ааспыт сылы ылан көрөр эбит буоллахха, маннааҕы аһы бэлэмниир тэрилтэлэр Аччыгый баһаар биир миллиард солкуобайга эргиннилэр. Ити көрдөрүү куорат олохтоохторо бэйэ аһыгар ордук интэриэһи ууралларын туоһулуур.

Дмитрий Громов, "Малый базар" бэйэ бородууксуйатын атыылыыр киин салайааччыта: «Оҥорон таһаарааччылар толкуйдуур толкуйбут хайдах гынан батарабытый диэн. Оҥорон таһаарыы биир, онтон батарыы эмиэ тутаах боппуруос. Аччыгый баһаарга оҥорон таһаараччылыар биир сиргэ түмсэн удамыр сыанаҕа атыылыыр усулуобуйаларын тэрийэбит».

Хоту оройуоннартан кэлэр балык эгэлгэтэ билигин туох баар бары көрүҥэр тиийэ атыыга тахсар буолла. Аҥаардас Саха сиригэр эрэ буолбакка, дойду киин өттүгэр эмиэ атыыга хамаҕатык барар. Бу курдук бэйэ аһыгар, бэйэ оҥорон таһаарыыга көрдөрүү улаатар, баҕалаахха туһааннаах өйөбүл бырагыраамата  кэҥиир.