Мэҥэ Хаҥаласка көтөр фермата сибиэһэй аһынан нэһилиэнньэни хааччыйар

Кууруссалар, чоппуускалар уонна бройлердар хаһаайкаларын көрөн аймана түһэллэр. Лариса Афанасьевна фермаҕа киириитэ көтөрдөргө сарсыардааҥы аһылык туоһута. Үөрбүт-көппүт курдук саҥалара улам улаатан айманаллара күүһүрэр, ас кутулунна эрэ тумсуларын тыаһа таһыгыраабытынан барар.

Бу саҥардыы арыллыбыт көтөрү иитэр ферма буолар. Улуус баһылыгын граныгар хапсан 5 мөлүйүөн сууммалаах өйөбүлү ылан 220 квадратнай миэтэрэлээх дьиэни туттан түргэнник ситэр салааҕа ылсан бройлер кууруссалары иитэн саҕалаабыт бааһынай хаһаайыстыба. Аҥардас биир дьиэ кэргэн күүһүнэн көтөрү Саха сиригэр да улахан ыарахаттара суох иитиэххэ сөп эбит диэн түмүккэ кэлбиттэр.

Лариса Иванова, "Сахабойлер" көтөрү иитэр ферма хаһаайката: "Бройлер куурусса олус түргэнник улаатар. Номнуо 40 хонугунан ситэр. Онтон сымыыттыыр кууруссаларбыт төптөрүтүн кырачааннар уонна сып-сытыылар".

Лариса Афанасьевна көтөрү тыыннаахтыы атыыласпат. Турцияттан сымыыттары сакаастаан инкубатарга иитэн улаатыннартаан таһаарар. Төрүөх ахсаана үчүгэй диэн кэпсиир.

Лариса Иванова, "Сахабойлер" көтөрү иитэр ферма хаһаайката: "Инкубатор21 -23 хонугунан таһаартыыр. Тасыыта үчүгэй. 630 сымыыты угабын уонна этинэн 400-чэкэ төбөнү ылабын".

Бу фермаҕа бары дьиэ кэргэнинэн үлэлииллэр. Оҕолоро улаатан илии-атах буолаллар, докумуон да өттүн кыайа туталлар. Онон Төҥүлүгэ саҥа хайысханы арыйан, кэскиллээҕин билэн хаһаайыстыбаларын кэҥэтэр санаалаахтар, оҥорон таһаарбыт эттэрин батарыы да өттө кыаллар боппуруос буолбут.

Лариса Иванова, "Сахабойлер" көтөрү иитэр ферма хаһаайката: "Олунньу ыйтан эппитин улуус балыыһатыгар тендергэ кыттан туттараары былаанныыбыт".

Биллэн турар, ханнык баҕарар хаһаайыстыбаҕа кыылы сөпкө иитии, аһатыы боппуруоһа сытыытык турар. Сатабыллаах хаһаайка көтөрдөрүн аһын табан, бройлердар 40 тан тахса эрэ күн иһигэр улааталлар, уойаллар. Биир күн иһигэр 50 киилэ куоруму уонна 20 киилэ нэчимиэни  сииллэр. Нэчимиэннэрин сайын устата  бэйэлэрэ үүннэрэллэр. 36 гаалаах сирдэн 220 туоннаны хомуйбуттар.

Лариса Иванова, "Сахабойлер" көтөрү иитэр ферма хаһаайката: «Бэйэбит ньэчимиэн ыһабыт. Онтубутун бэйэбит үлтүрүтэбит анал тэрилгэ итиэннэ ону былааммыт аһата олоробут».

Тыа хаһаайыстыбата ынаҕы-сылгыны эрэ иитииннэн муҥурдамматын Ивановтар бэйэлэрин холобурдарынан көрдөрөллөр.  Сахабыт сиригэр тыа сирин биир ураты дьарыгын көҕүлүүллэр. Хаһаайыстыба бастакы кыстыгын этэҥҥэ туораан эрэр.