"Кэрэ көмүскэлигэр" испиктээкил сүрэхтэниэ

1940 сыллаахха балаҕан ыйын 15 күнүгэр 34 эдэркээн саха бастыҥ ыччата Ленинград куоракка Александр Островскай аатынан театральнай институкка үөрэнэ тиийбитэ. Кинилэр норуокка "могучая студия” диэн  ааттаналлара. Щепкин аатынан үрдүкү театральнай училищены былырыын саҥа бүтэрэн кэлбит Василий Романов ол саҕана бүтүн 84 сыл анараа өттүгэр үөрэнэ барбыт Ленскэйтэн сылдьар Егор Мыреев диэн уол оруолун толорор. 

Василий Романов, П.А. Ойуунускай аатынан Саха театырын артыыһа: “Кини наһаа талааннаах уол эбит. Айылҕаны олус таптыыр эбит. Олус үчүгэйдик тойуктуур, олоҥхолуур. Үөрэнэ барыан иннинэ бииргэ төрөөбүттэригэр, доҕотторугар үс күн устата олоҥхолуур эбит. Көр, маннык талааннаах оҕолор үөрэнэ барбыттар эбит ”.

Бүтүн отут түөрт хаарыан ыччат инники дьылҕата, кэлэр кэскилэ хаарга быраҕыллыбыт сибэкки кэриэтэ кырыыстаах сэрии хабыр хаһыҥыттан хагдарыйа кэхтибитэ. Иван Гоголев пьесатынан, Евгения Липковская, Исай Попов ахтыыларыгар, суруйууларыгар олоҕурбут испиктээкил кэлэр нэдиэлэҕэ тохсунньу 26 күнүгэр - оруобуна Аҕа дойду сэриитигэр Ленинград куорат блокадатын 80 сыллаах үбүлүөйүгэр ананан көстүөҕэ.

Руслан Тараховскай, П.А. Ойуунускай аатынан Саха театырын сүрүн режиссёра: "Үөрэхтэрин саҥа бүтэрэн кэлбит оҕолору Саха тыйаатырын историятын билиһиннэрээри, тыйаатыр үгэстэригэр, тыыныгар иитэри бу испиктээкили туруордубут. Бу испиктээкил аан маҥнайгытын 1983 сыллаахха Федот Потапов туруорбута, онтон мин 2005 сыллаахха Арктика институтун бүтэрэрбэр түмүктүүр үлэм этэ. Онтон билигин өссө саҥардыллан үһүс туоруута".

Оруолларга, этиллибитин курдук, сүрүн састаабы Щепкин аатынан алтыс студия артыыстара оонньоон бэйэлэрин кыахтарын, талааннарын арыйан көрдөрүөхтэрэ. Ирдэбиллээх режиссер Руслан Тараховскай күннэтэ кыраҕы хараҕын далыгар сылдьан маастарыстыбаларын чочуйаллар.

Нам улууһуттан сылдьар Нарыйа Колесова Пелагея Борисова диэн устудьуон кыыс оруолун толорор. Оруолбар  бэлэмнэнэрбэр Пелагея Борисова туһунан суруйуулары, биографиятын көрдөөн,ааҕан, ону тиһэн бэлэмнэнэбин диэн кэпсиир.

Нарыйа Колесова, П.А. Ойуунускай аатынан Саха театырын артыыһа: "Бастаан үлэлии кэлэн баран массовкаларга киирбиппит. Бастакы оруолбар “Охсор чаһы дуораана” диэн испиктээкилгэ Даша оруолун толорбутум. Онтон  иккис оруолум бу испиктээкилгэ Пелагея Борисова оруола".

Хас биирдии артыыска кини оруола бу улахан эппиэтинэс, долгуйуу.

Александр Захаров, П.А. Ойуунускай аатынан Саха театырын артыыһа: "Анараа наар учууталларбыт такайа сылдьыбыт буоллахтарына, манна барыта бэйэҥ, холобура. Оруолгун эҥин бэйэҥ оҥороҕун".

Онон эдэркээн артыыстар Кэрэ көмсүкэлигэр испиктээкилинэн сүрэхтэнэн, хатарылан талан ылбыт идэлэрин киэҥ аартыгар үктэниэхтэрэ.