Бөрө сылгыны тардыыта элбиир

Бу кыһын сыллата буоларын курдук өрөспүүбүлүкэ араас муннуктарыгар бөрө буулаан, мэнээктээн сыспай сиэллээххэ улахан хорумньу таҕыста.  Чурапчы улууһун Болугуругар быйыл эмиэ бөрө кыра-кыралаан баарын биллэрэн сылгылаах дьоҥҥо кутталы үөскэттэ. Олохтоох булчуттар бултаһа сатыыллар да былырыын киирбит сокуон улаханнык атахтыыр диэн санааларынн үллэстэллэр.

Данил Павлов, булчут: "Билигин да уонча бөрө баар диэн ааҕабыт. Үс үөрдээх, икки үөрдээх уонна соҕотоҕун сылдьааччылар бааллар. Сылгы сылдьар сирдэригэр кэлэн бараллар. Сокуон уларыйан бөрөнү бултаһааччылары олус атахтыыр буолла. Бөрө ыыра сүрдээх киэҥ. Холобура, бу ыырыгар уон күнүнэн эбэтэр икки ый буолан баран эргиллэн кэлиэн сөп".  

 Бултаммыт бөрөлөр хаартыскалара социальнай ситим нөҥүө өрөспүүбүлүкэ үрдүнэн киэҥник тарҕанар. Киһи сөҕүөх эрэ улахан кыыллара кытары бааллар. Бүтэһик сылларга бөрө ахсаана элбээбитэ бэлиэтэнэр. Өскөтүн 2022 сыллаахха 2546 бөрө баара биллэр эбит буоллаҕына 2023 сыл түмүгүнэн 2964-кэ тэҥнэспит. Ол аата 418 төбөннөн эбиллии баара көстөр.

2023 сыл түмүгүнэн бөрөлөр, ыттар уонна тыатааҕы буолан 200 сылгыны тарпыттар, бу иннинээҕи сыл көрдөрүүтүн кытары тэҥнээтэххэ 9 төбөнөн аччаабыт. Өскөтүн ыттар 25 сыспай сиэллээҕи өлөрбүт эбит буоллахтарына, тыатааҕы 66 төбөнү сиэбит. Оттон саамай улахан хоромньуну бөрөлөр таһаарбыттар. Кинилэр 109 сылгыны сиэбиттэр. Онтон хоту дойду маанылаах кыылын табалары бу ааспыт сылга бөрөлөр да тыатааҕылар да кыайа-хото бултаспыттар. 5764 төбө ардай аһыылаах аһа буолбут, тыатааҕы баппаҕайыттан 846 таба өлбүт.

Иннокентий Слепцов, Айылҕа баайын харыстыыр дирекция булт салаатын салайааччыта: "25 анал биригээдэ тэриллибитэ. Ону сэргэ түөрт мобильнай биригээдэ тэриллэн турар. Итиэннэ бөрөлүөн баҕалаах дьону кытта дуогабар түһэрсэбит".

Мэнээктээбит бөрөнү бултааһыҥҥа 3 эрэ күн бэриллэрэ булчуттары улаханнык атахтыыр. Бу боппуруоһу булчуттар туруорса сатаабыттара ыраатта. Билиҥҥитэ кыһалҕа кыайан быһаарыллыбакка турар. Балаһыанньа өссө сытыырхайар.

Иннокентий Слепцов, Айылҕа баайын харыстыыр дирекция булт салаатын салайааччыта: "Онон биһиги региоммутугар сөп түбэспэт. Айылҕа ресурсатын министиэристибэтин кытта үлэ бара турар".

Булчуттар билигин үлэлиир 3 күннээх хааччахтааһыны тутуспаттара кимиэхэ да кистэлэҥ буолбатах. Ол эрэн кистээн, саһа сылдьар бултуур кимиэхэ да табыгаһа суох. Онон сокуон уларыйыытыттан элбэх тутулуктаах. Оччоҕуна бөрө ахсаана аччыа, хоромньу да аҕыйыа турдаҕа.