"Самородок" басейыҥҥа саҥа лифт оҥоһулунна

«Самородок» бассейыҥҥа лифт баар буолла. Көннөрү лифт буолбакка, чуолаан кэлээскэлээх инбэлииттэргэ анаан-минээн таҥыллыбыт тутуу. Лифты аһыы үөрүлээх тэрээһинигэр кыһыл лиэнтэни быһар чиэскэ Спорт миниистирин эбээһинэһин толорооччу Александр Бугаев, Россия спордун маастара, остуол тенниһыгар чемпион Михаил Неустроев уонна оҕунан ытыыга  дойду хас да төгүллээх чемпиона Валентин Борисов тигистилэр. Валентин Борисов төһө да доруобуйатыгар хааччахтаах буолбутун үрдүнэн спордунан утумнаахтык, ситиһиилээхтик дьарыктанар. Оҕунан ытыыга, остуол тенниһыгар дойду таһымыгар хаста даҕаны кыайан чемпион үрдүк аатын сүгэр.

Валентин Борисов, оҕунан ытыыга, остуол тенниһыгар РФ хас да төгүллээх чемпиона: «Бу сүрдээх улахан ситиһии. Тоҕо диэтэххэ усулуобуйа суоҕуттан сылтаан олус элбэх киһи спордунан дьарыктаныан баҕалаах да кыайан кэлэр кыахтара суох, дьиэлэригэр кэлэр кыахтара суох. Онтон билигин көрдүлэр, таһырдьа пандус баар уонна лифт оҥоһулунна. Онон сылдьааччы элбиэ дии  саныыбын».

«Самородок» бассейн уон сыллааҕыта өрөспүүбүлүкэ адаптивнай физкультураҕа уонна спордун киининэн буолбута. Ол сыл дьиэ тас өттүгэр пандус тутан үлэҕэ киллэрбиттэрэ. Бассейн дьиэтэ 1988 сыллаах тутуу, хара маҥнайгыттан былаанынан манна лифт суоҕа. Онтон 4 сыллааҕыта пандемия кэмигэр инвестиционнай бырагыраама туһааннаах бырайыагар хапсан лифт тутуута олоххо киирэр кыахтаммыта. 2022-2023 сылларга бырайыактыыр-сметалыыр үлэлэр ыытыллан, тутуу баран, ааспыт ахсынньы ыйга эбийиэк тутуута түмүктэммитэ. Барыта сүүрбэ үс мөлүйүөнтэн тахса суумма көрүллэн үлэ ыытыллыбыта.

Ньургун Иванов, СӨ адаптивнай физкультура уонна спорт Киинин дириэктэрэ: «Бырайыакпыт сүрүн сыала лифт туруоруута этэ. Бырабыыталыстыба, министиэристибэбит өйөөһүнүнэн бырайыак көмүскээбиппит. Онно бу соругу инвест бырагыраамаҕа киллэтэрэммит үлэҕэ киирдэ».

Уонтан тахса кэлээскэлээх инбэлиит дьон манна кэлэн дьарыктанар. «Самородок» бассейыҥҥа бары категориялаах инбэлииттэр кэлэн харбааһыҥҥа үөрэнэн дьарыктаныахтарын сөп. Улахан дьон даҕаны, оҕолор даҕаны.  Бүгүҥҥү күҥҥэ алта уон араас инбэлииттээх оҕону түөрт тренер дьарыктыыр. Харбааһын киһи доруобуйатыгар үтүө дьайыылааҕа дакаастанан турар. Онон лифт баар буолан дьарыктанааччы ахсаана өссө эбиллиэ турдаҕа.

Ирина Лебедева, СӨ инбэлииттэрин уопсастыбатын бэрэссэдээтэлэ: «Биһиги уопсастыбабыт инбэлииттээх дьоннорго араас тэрээһиннэри оҥоробут. Күн бүгүн өрөспүүбүлүкэҕэ 58 тыһыынчаттан тахса инбэлиит баар эбит буоллаҕына онтон 60% спордунан дьарыктанар».

Доруобуйаларыгар хааччахтаах дьон уопсастыбаҕа тэҥ бырааптаах буолалларыгар, кинилэргэ анаан тустаах усулуобуйа тэриллэригэр болҕомто ууруллар.