«Инникигэ хардыы» кыайыылаахтара билиннилэр

Үс күннээх улахан күрэхтэһии кэннэ эдэр чинчийээччилэр Хотугулуу-Илиҥҥи федеральнай университет дьиэтигэр мусталлар. Манна үгэс быһыытынан өрөспүүбүлүкэбит саамай улахан научнай-чинчийэр күрэҕин түмүгүн билиһиннэрэллэр. Хас хайысха ахсын лауреаттар, стипендиаттар ааттара ааттанар. Ол курдук, 8-с кылаас үөрэнээччитэ Антон Потапов дипломант аатын ылан үөрэн-көтөн турар.

Антон Потапов, "Инникигэ хардыы" научнай конференция дипломана: «Мин Саха сиригэр туризм туһунан остуол оонньуутун айдым. Манна төрүт култуураны уонна бэлиэ сирдэри билиигэ туһуланар сорудахтардаах».  

Онтон кыайыы өрөгөйүн, ситиһии үөрүүтүн Кытай өрөспүүбүлүкэтиттэн сылдьар Лю Цзелун биллэ. Кини манна Арктика оскуолатыгар кэлэн үөрэммитэ хаһыс да сылыгар барда. Кини төрөөбүт төрүт тылын чинчийбитин экспертэр үрдүктүк сыаналаан лауерат аатын биэрбиттэр.

Лю Цзелун, "Инникигэ хардыы" научнай конференция лауреата: «Бу конференцияҕа мин маҥнайгыбын кытынным. Кытай ыҥырыы суруктарын истилиистэкэтин уонна лиэксикэтин уратыта диэн барайыагы көмүскээтим. Лозуннары мин бэйэм олорор Гуанчжоу куораппыттан ылбытым итиэннэ куйаар ситимиттэн».  

Конференция чэрчитинэн учууталларга аналлаах семинардар, эдэр учуонайдарга, аспираннарга туһуламмыт араас таһымнаах көрсүһүүлэр аастылар. Сүрүн сорук 2021 сыллаахха биллэриллибит наука уонна технология 10 сылын чэрчитинэн эдэр учуонайдары бэлэмнээһин буолар.

Нинель Малышева, М.К. Аммосов аатынан ХИФУ наука уонна инновация департаменын дириэктэрэ: «Биһиэхэ үс улахан сорук турар. Бастатан туран, 2030 сылга диэри эдэр чинчийээччи ахсаана элбиэхтээх. Иккиһинэн, учуонайдарбыт үлэлэрэ ыччакка, нэһилиэнньэҕэ тиийимтиэ буолуохтаах».

Быйылгы күрэх элбэх уларыйыылаах, саҥа сүүрээннээх буолла. Ол курдук, аан бастакытын Чукоткаттан уонна Приморскай кыраайтан оҕолор кытыннылар. Ахсаан бу сылга1572 киһиэхэ тэҥнэстэ.

Александра Яковлева, СӨ Билим дьоҕус академиятын проректора: «Быйыл Приморскай уонна Чукотка кытыннылар. Маны сэргэ быйыл саҥа хайысхалар аһылыннылар. Ол курдук Айти хайысхалар баар буоллулар. Тоҕо диэтэххэ Айти оскуолалар материальнай техническэй базалара кэҥээн бу өттүтүнэн бырайыак ахсаана элбээтэ диэммит эбии оҥордубут».

Кыайыылаахтар уонна дипломаннар аны дойду таһымыгар кытта барыахтара. Кинилэргэ анаан өрөспүүбүлүкэ бастыҥ учуонайдара сүбэ-ама буолуохтара. Онно эбиитин инники идэлэрин талалларыгар туһуламмыт көрсүһүүлэр буоллулар.