Чурапчы биир бастыҥ хаһаайыстыбатыгар кыстык хаамыыта

Марфа Сибирякова ыанньыксытынан үлэлээбитэ быданнаата. Уопуттаах үлэһит  билигин хотон үлэтэ чуумпуран турар кэмэ, улахан көрүүтэ-истиитэ аны саас ынахтар төрөөн саҕалаатахтарына баар буолуо диэн кэпсиир. Хаһаайыстыбаҕа кыһынын 18 киһи үлэлиир, оттон сайынын 30-ча киһилээх. Сарсыардаттан киэһээҥҥи диэри ыанньыксыттар үлэ түбүгэр сылдьаллар. Сыспай сиэллээҕинэн, хороҕор муостааҕынан биллэр Чурапчы улууһун биир бөдөҥ хаһаайыстыбатыгар үлэлиир, биллэн турар элбэх эппиэтинэһи уонна үлэҕэ бэриниилээх буолары эрэйэр.

Марфа Сибирякова, "Комплекс" бааһынай хаһаайыстыба ыанньыксыта: "Бу хотоҥҥо 120 сүөһү кыстаан турар. Онтон улахан аҥаара ыанар ынах. Билигин күҥҥэ иккитэ ыы сылдьабыт. Төрүүллэрэ сорохторо чугаһаата".

"Комплекс" бааһынай хаһаайыстыба бу хотоҥҥо 2017 сыллаахха киирбитэ. Онтон ааспыт сыл тыа хаһаайыстыбатын министиэристибэтин нөҥүө туһааннаах бырагыраамаларга кыттан, хотон турар сириттэн үс көстөөх сиргэ сылгы базатын туттубуттара. 2022 сыллаахха дьиэ кэргэн грааныгар кыттан, күрүөлээх-хаһаалаах сайылык оҥостубуттара. Уонна Чурапчы улууһа тэрийэр "Ийэ сир" диэн бырагырааманан Таатта үрэҕи быһан икки сиринэн хаһаайыстыба быһыт оҥостубута. Улуус уонна өрөспүүбүлүкэ тыа хаһаайыстыбатыгар улахан болҕомтону уурар буолан, "Комплекс" хаһаайыстыба бастыҥ үрүҥ аһы уонна эти Чурапчы оҥорон таһаарар хаһаайыстыбатыгар биэрэр.

Иван Парфенов, "Комплекс" бааһынай хаһаайыстыба дириэктэрэ: "Ил Дархан анал этиитигэр уонна тыа хаһаайыстыбатын миниистирэ иһитиннэрбитинэн сүөһү, сылгы иитиитин өйүүр анал бырагыраамалар эбиллиэхтээхтэр. Ону биһиги астына истэбит. Анал идэтийбит сүөһү көрөр хаһаайыстыбаларга ороскуоттарын толуйуулара сыллата бүддьүөккэ көрүллүө диэн эрэллээхпит".

Уопсайа 3 хотонунан сүөһүлэр кыстыыллар. Бу 120 төбөҕө ананан оҥоһуллубут ыанньык. Маны таһынан 100 миэстэлээх субан сүөһү уонна 70 миэстэлээх ньирэй хотоно баар. Ааспыт сыл 650 туонна оту, 300 туонна сенаһы, 550 туонна сиилэһи бэлэмнээтилэр. Оттон сыл устата 330 туонна үүтү ыатылар. 

Иван Парфенов, "Комплекс" бааһынай хаһаайыстыба дириэктэрэ: "Урукку сылларга холоотоххо быдан үүнүүлээх өлгөм сыл буолан ити көрдөрүүлэр барыта толорулуннулар. 10 сыл анаар атын сирдэргэ оттоон кэллибит”.

Бу эбийиэктэр бары толору гаас оһоҕунан ититиллэн тураллар. Бу сыл гараж уонна бурдук ыскылаата тутуллуо. Тиэхиньикэ чааһыгар хаһаайыстыба сыл аайы ас оҥорон таһаарар бырагыраамаҕа сыл аайы киирсэн үлэлэһэллэр.  Сир оҥоруутугар 300 гектар бааһыналаахтар, ол сири таҥан ааспыт сыл 60 гектары эбии кэҥэттилэр. Ол чэрчитинэн саҥа комбайн, сир таҥастыыр тыраахтары ылыннылар. Уонна Ил Дархан "Комплекс" хаһаайыстыбаҕа саҥа МТЗ тыраахтары бэлэхтээбитэ.