Балыыһаларга саҥа массыыналар кэллилэр

Ил Дархан Айсен Николаев сабыс саҥа массыыналар аалай лиэнтэнэн бааллыбыт күлүүстэрин улуус киин балыыһаларын кылаабынай быраастарыгар туттартыыр. "Доруобуйа харыстабыла" национальнай бырайыагынан барыта 32 көлө кэлбит. Маны 25 улууска тыырбыттар. Онон сорох оройуоннар иккилии күлүүһү туттулар. Өлүөхүмэ улууһугар бэриллибит көлөнү Даппарай нэһилиэгэр анаабыттар. Кылаабынай быраас Александр Николаев ыраах сытар нэһилиэгэ ыарыһахтары киин балыыһаҕа таһар массыыналаммытыттан үөрүүтэ улахан. Көлө медицинэ бастакы сүһүөҕэр анаан оҥоһуллубут буолан олус табыгастаах буолуохтааҕын  кэпсиир.

Александр Николаев, Өлүөхүмэ улууһун киин балыыһатын кылаабынай бырааһа: "Бу массыыналар биһиэхэ улахан көмө буолаллар хаһаайыстыбабытыгар уонна ыарыһахтары улуус киинигэр киллэрэрбитигэр туттабыт сүрүннээн".

Горнай улууһун массыыната Маҕарас балыыһатыгар бэрилиннэ. Уопуттаах суоппар Дагай тута уруулга олорон бэрэбиэркэлиир, тутан-хабан көрөр. Кини Кылаабынай бырааһы кытары көлөлөрүн көрөллөр-истэллэр. Уруккулардааҕар туох уратылааҕын тэҥнииллэр.  

Егор Григорьев, Горнай улууһун киин балыыһатын кылаабынай бырааһа: "Саҥа массыына аанын хатыыра уларыйбыт уонна сиэккилэтэ улахана биһиэхэ олус табыгастаах буолбут. Иһинээҕи бүрүөһүнэ эмиэ тупсубут. Суоппарбыт айаннаан кэлэригэр тыаһа-ууһа үчүгэй диэн сыаналаата".

Бу массыыналар доруобуйа харыстабылын маҥнайгы тиһигэр аналлаахтар. Онон онно сөп түбэһэр гына собуокка таҥыллыбыттар. Ханнык да ыраах сиргэ эмтэнии дөбөҥ уонна түргэн буоларын тупсарыыга туһуланаллар.

Онтон Амма улууһа бу сырыыга тохсус массыынатын күлүүһүн тутта. Былырыын 3 тырааныспары ылбыттара. Ол курдук суһал көмө массыыната уонна рентген, маммография аппараттардаах автобус итиэннэ Болугур амбулаториятыгар  көлө.

Михаил Архипов, Амма улууһун киин балыыһатын кылаабынай бырааһа: "Быйыл ылар массыынабыт Эмис амбулаториятыгар барыаҕа. Маннык көлөлөр кэлэллэрэ биһиэхэ сүрдээх көмөлөөх. Ыарыһахтары таһыы, анализтары илдьии түргэтиир. Эмис нэһилиэгэ регион суолталаах суол кытыытыгар турар. Онон онно туох эмэ суһал көмө наада буоллаҕына туһанарга бэриллэр" .

Онтон бу сотору кэминэн саҥа киин балыыһаланыахтаах Чурапчы улууһа эмиэ массыына күлүүһүн тутта. Онон саҥа поликлиника саҥа көлөлөөх буолла. 

Николай Сивцев, Чурапчы улууһун киин балыыһатын кылаабынай бырааһа: "Терапевт, педиатр быраастарга нэһилиэк иһигэр сүүрэргэ, дьиэттэн анализ  ыларга аналлаах массыыналар тиийэн кэллилэр. Онон биһиги үөрүүбүт улахан. Көлөбүт ахсаана кэҥиир, сылтан сыл саҥа масыыналар кэлэ тураллар".

Кэнники биэс сылга Саха сирэ доруобуйа харыстабылыгар уопсайа барыта 313 массыынаны ылбыт.