Үүммүт сыл бастакы нэдиэлэтигэр киһи өлүүлээх суол быһылааннара таҕыстылар

Ол курдук үүммүт сылга бастакы улахан саахал тохсунньу 7 күнүгэр Горнай улууһугар Бүлүү федеральнай айан суолун 105 км. таҕыста. “Тойота Виш” массыына суоппара уруулун сатаан туппакка, утары иһэр “Тойота Хайс” микроавтобуһу кытта харсыста. Быһылаанна “Тойота Виш” массыынанан айаннаан испит 38 саастаах дьахтар тыына быһынна, 7 киһи араас эчэйиини ылан балыыһаҕа киирдэ. Нөҥүө күн тохсунньу 8 чыыһылатыгар аны Алдан улууһугар “Лена” федеральнай трасса 643 км. “Тойота Приус Альфа” массыына суоппара эмиэ утары суолга тахсан “Мазда Аксела” массыына суоппара саахалтан мүлчү көтөөрү хаҥас диэки салайан утары иһэр массыынаны кытта харсыспытын түмүгэр Мазда суоппара миэстэтигэр суорума суолланна, икки киһи ыарахан туруктаах балыыһаҕа киирбит. 

Күннэй Иванова, суолга-иискэ куттала суох буолууну хааччыйар СӨ государственнай инспиэксийэтин пропагандаҕа старшай инспиэктэрэ: «Улахан түөрт дорҕоонноох быһылаан таҕыста. Ол курдук, Алдан, Горнай, Томпо улуустарын федеральнай суолларыгар уонна биир саахал Өлүөхүмэ оройуонугар таҕыста. Бу саахаллар сүрүн төрүөтэ утары тимир көлө кэлэр суолугар киирэн биэрии, түргэни, икки ардыларын тутуспакка уонна болҕомтото суох буолуу».

Маны тэҥэ тохсунньу 8 күнүгэр Мэҥэ Хаҥалас уонна Нерюнгри улуустарыгар эмиэ хас да массыына уонна автобус кыттыылаах суол саахаллара таҕыстылар. Дьокуускайга бу уһун өрөбүллэргэ эмиэ саахал, быраабыланы кэһии сыыппаратын көрдөрүүтэ үрдүк. Бырааһынньыктааҕы өрөбүл күнэргэ Өрөспүүбүлүкэ суолларыгар ГИБДД инспиэктэрдэрэ бэрэбиэркэлиир рейдэлэри тэрийбиттэрин түмүгэр, бүтүн 4 тыһыынча кэриҥэ административнай боротокуолу толордулар. 111 итирик туруктаах суоппары туттулар.

Күннэй Иванова, суолга-иискэ куттала суох буолууну хааччыйар СӨ государственнай инспиэксийэтин пропагандаҕа старшай инспиэктэрэ: «Суол-иис үлэһиттэрэ бырааһынньык кэмигэр тохтобула суох рейдэ үлэлэрин ыыттылар. Үлэ түмүгэр уопсайа 3971 административнай боротокуол толорулунна. Итирик туруктаах 111 суоппар тохтотулунна. Хос итирик уруулга олоруу 9 таҕыста. Бырааба суох 160 суоппарга административнай матырыйаал толорулунна».

Ааспыт сылга Өрөспүүбүлүкэ үрдүнэн уопсайа 807 саахал тахсыбытын түмүгэр 69 киһи суорума суолламмыт, биир тыһыынчаттан тахса киһи араас таһымнаах эчэйиини ылбыт. Ол иннинээҕи 2022 сылы кытта тэҥнээтэххэ, саахал ахсаана уонна эчэйии көрдөрүүтэ элбээбит, онтон киһи өлүүтэ аччаабыт. Хас биирдии быһылаан - бу киһи олоҕо. Онон суол-иис хамсааһынын кыттааччылара бэрт болҕомтолоох буолаллара эрэйиллэр эрээри, статистика чахчыта сыллата тэҥинэн, биитэр үрдээбит сыыппараны көрдөрөр, онон кыра да аччааһын - бу ситиһии. Суолга, айаҥҥа бэрт сэрэхтээх буоларгытын умнумаҥ.