Чурапчы орто оскуолатын түмэлэ Арассыыйа 50 бастыҥ түмэлин ахсааныгар киирэри ситистэ

Балаҕан иһигэр Аҕа дойду Улуу сэриитин кэминээҕи мал. Остуолга оччотооҕу сылларга кыайыыны уһансыбыт танкалар макеттара турар. 8-с кылаас үөрэнээччитэ Павел Дьячковскай 8 сааһыттан пластилинтан араас сэрии сэбин оҥоруунан дьарыктанар. Бастаан, киһи хотуобай оонньуурга ханыылыы көрөр, оттон чугастан көрдөххө, хас биирдии чымпыгар тиийэ чуолкайдык илиинэн оҥоһуллубутун бэлиэтиир. Бу оҥорбут макеттарын Дойду киинигэр Москваҕа көрдөрүүгэ ыҥыран тураллар. Хас биирдии танка быһаарыыта көрөөччүгэ сиһилии суруллан турар.

Павел Дьячковскай, И.М. Павлов аатынан Чурапчы орто оскуолатын 8-с кылааһын үөрэнээччитэ: «Бу Т-90 диэн бэйэ дойдубут танката. 2021 сылга оҥоһуллубута. В-92 диэн двигатель олорор, 1200 ат күүстээх».

Сэрии буолан ааспыт сирдэринэн сураҕа суох сүппүт саллааттар уҥуохтарын, туттар малларын, араас сэрии сэптэрин көрдүүр анал үлэлэргэ үөрэнээччилэр сыллата улахан кылааттарын уураллар. Хонуу усулуобуйатыгар 2 нэдиэлэ устата лааҕыр тэринэн, эттэринэн-хааннарынан оччотооҕу сыллар уорааннарын илэ билэллэр. Онно булбут малларын хас биирдиитин докумуоннаан манна түмэлгэ аҕалан туруораллар. Экспедииссийэҕэ уонна быйыаннай күрэхтэргэ араас сылларга сылдьыбыт оҕолор сырыыларын туһунан кэпсээтилэр.

Ольга Дьячковская, И.М. Павлов аатынан Чурапчы орто оскуолатын выпускнига: «Атын этэрээт быраҕыллыбыт лааҕырын булбуппут. Ол лааҕыртан 15 игин хардыы курдукка икки киһи уҥуоҕун булбуппут».

Владислав Красильников, И. М. Павлов аатынан Чурапчы орто оскуолатын 7-с кылааһын үөрэнээччитэ: «Дойду үрдүнээҕи байыаннай эстафета буолла. 14 Арассыыйа куората кыттыбыта, ону биһи 6-ыс кылаастар улахаттары кыайан 3 миэстэ буолбуппут».

1943 сыллаахха олунньу 23 күнүгэр Старай Руссаны босхолуур улахан кыргыһыыга 600-чэ саха уола кыргыһыы хонуутугар знамяларын илдьэ охтубуттара. Карбышевскай хамсааһын салайааччыта Юрий Дьяков генерал-майор көмөтүнэн, Москваҕа байыаннай чаастар знамяларын бэлэмниир флажнай мануфактураҕа саҥаттан оҥотторон таһаардылар. Буойуттар хорсун быһыыларын тилиннэрэн, Санкт Петербурдааҕы артиллерия инженернэй сэриилэр кииннэммит түмэллэригэр 18-с Ленинградскай байыаннай уокурук сапернай биригээдэтин эписсиэрдэрин илиилэриттэн знамяны Саха сиригэр илдьэ кэллилэр.

Дьулуур Попов, И.М. Павлов аатынан Чурапчы орто оскуолатын 9-с кылааһын үөрэнээччитэ: «Ол улуустары кэрийэммит биһиги патриотизмы үчүгэйдик санаттыбыт. Эдэр көлүөнэҕэ сэриигэ кыттыбыт дьоннор тустарынан кэпсээтибит».

Аҕа дойду улуу сэриитин кыттыылааҕа Иван Михайлович Павлов  67 тыһ. саха саллаатын үйэтиппитэ, хас эмэ сылы быһа оҥорбут улахан нэһилиэстибэтин салгыы кини аатын сүгэр оскуолаҕа хаалларбыта. Онтон ыла бу оскуола арассыыйа таһымнаах байыаннай күрэхтэргэ куруук инники күөҥҥэ сылдьар.

Михаил Дьячковскай, И.М. Павлов аатынан Чурапчы орто оскуолатын Албан аат түмэлин салайааччыта: «80-тан тахса регионтан биһи оҕолорбут 10 иһигэр киирэллэр. Ити сүрдээх улахан ситиһии. Эр киһи быһыытынан ситэллэригэр, хотоллоругар, дойдуларыгар бэриниилээх буолалларыгар улаханнык көмөлөһөр».

Дмитрий Попов, И.М. Павлов аатынан Чурапчы орто оскуолатын патриотическай иитиигэ учуутала: «”Прорыв года” диэн улахан наҕарааданы ыллыбыт. Ону Михаил Владимирович куоракка киирэн ыччат министиэристибэттэн тутан таҕыста. Иннэ гынан наһаа үөрдүбүт».

2 сылга биирдэ өрөспүүбүлүкэтээҕи Павловскай ааҕыылары тэрийэн ыыталлар. Маны таһынан оскуола үөрэнээччилэригэр нэдиэлэҕэ биирдэ юнармия күнэ буолар. Память байыаннай кулууп 6 хайысханан байыастары дьарыктаан таһаарар, ол түмүгэр бу кулууп иитиллээччилэрэ саха сиригэр бастыҥ көрдөрүүлээхтэр.

Александр Оконешников, "Память" байыаннай кулууп салайааччыта: «Чурапчы улууһа кэнники 3 сылга субуруччу Өрөспүүбүлүкэ үрдүнэн ыытыллар “Снежный барс” күрэхтэһиигэ кыайан турар».

Оҕону патриотическай иитиигэ бары кылаатын уурар байыаннай хайысхалаах Чурапчы оскуолата 5 кылаастан бары өттүнэн дэгиттэр үөрэнээччилэри иитэн таһаарар.