Саха сиригэр Кириһиэнньэҕэ бэлэмнэнии саҕаланна

Итэҕэллээхтэр сибэтиэй күннэрэ чугаһыыр, ону кытары ыксаллаах быһыы-майгы министиэристибэтин үлэһиттэрин үлэлэрэ икки бүк үрдүүр. Күөх хонууга бүгүн улахан хамыһыйа тахсан, Кириһиэнньэ буолар сирин быһаардылар. Ойбон алларыллар миэстэтин таллылар. Алын суудуналарга инспекция үлэһиттэрэ муус халыҥын бэрэбиэркэлээтилэр.

Идэлээхтэр бэлиэтииллэринэн быйыл муус бу миэстэҕэ хаһааҥытааҕар да халыҥ. Миэтирэни куоһарар. Онон күн сарсыҥҥыттан улахан тиэхиникэ киирэн хаары ыраастыыр үлэни ыытан саҕалыа. Кириһиэнньэ буолар сиригэр киирэр аартыктар оҥоһуллуохтара. Сыллата буоларын курдук, таҥас уларыттар сирдээх улахан балаакка туруоҕа.

Майя Алексеева, ЫБММ Саха сиринээҕисалалтатын дьон ууга куттала суох буолуутун хааччыйар салаатын салайааччыта: «Тохсунньу ый 18-20 күннэригэр Өрөспүүбүлүкэ үрдүнэн Кириһиэнньэ кэмигэр ойбоҥҥо сөтүөлээһин ыытыллар. Бу хайысханнан билигин үлэ бара турар. Бүгүн Дьокуускай куорат Күөх хонуу миэстэтигэр Кириһиэнньэни ыытар хамыыһыйа миэстэни талла, ону ГИМС инспектордара муус халыҥын кээмэйдээтилэр. Маны тэҥэ дьон сэрэхтээх буолуу ыйынньыга буола турар. Бу чэрчитинэн ГИМС инспектордара оҕо уһуйааннарыгар, үөрэх кыһаларыгар лекция ааҕаллар. Уонна көҥүллэммэтэх муус суолларыгар холбоһуктаах рейдэлэри ыыталлар ГИБДД уонна административнай хамыыһыйа буолан. Сокуону кэспит суоппардар Саха өрөспүүбүлүкэтин административнай сокуону кэһии 9.10 ыстатыйатынан эппиэтинэскэ тардыллаллар. Бүгүҥҥү күҥҥэ 125 дьыала тэриллэн турар. Санатан эттэххэ Өрөспүүбүлүкэ үрдүнэн билигин 40 муус суола үлэлии турар. Ол курдук 6 федеральнай суолталаах, 4 өрөспүүбүлүкэтээҕи уонна 30 муниципальнай».

Маныаха Хоту оройуоннар муус суолларыгар тимир көлө сылдьар ыйааһына үрдээтэ. Ол курдук, Саха өрөспүүбүлүкэтин суолга салалтатын уурааҕынан Өлөөн - Эбэлээх хайысхатынан 20 туоннаҕа суол арылынна итиэннэ 30 туоннаҕа диэри Удачнай уонна Өлөөн бөһүөлэгин икки ардынан үрдээтэ.

Татьяна Степанова, ЫБММ алын суудуналарга инспекциятын дьон ууга куттала суох буолуутун хааччыйар салаа салайааччытын солбуйаччы: «Убаастабыллаах Өрөспүүбүлүкэ олохтоохторо. Анаан оҥоһуллубут муус суолларынан айаннаан. Ыйыллыбыт суол бэлиэлэрин уонна көҥүллэммит ыйааһыннары булгуччу тутуһун. Олоххутун харыстаан».

Маннык сэрэтии Кириһиэнньэ кыттыылаахтарыгар эмиэ ирдэнэр. Онон бу нэдиэлэттэн саҕалаан, Өрөспүүбүлүкэ үгүс улуустарыгар сибэтиэй бырааһынньыкка бэлэмнэнии үлэтэ ыытыллан саҕаланар. Сыллата буоларын курдук, бу күн ГИМС инспектордара, быыһыыр сулууспа үлэһиттэрэ, медицинскэй суһал көмө эмчиттэрэ уонна ис дьыала уорганнарын үлэһиттэрэ дьуһуурустубаҕа тахсан, Кириэһиэннэ күнэ этэҥҥэ ааһарыгар үлэлиэхтэрэ.