Саҥа дьыл өрөбүллэригэр киһи өлүүлээх суол саахаллара бэлиэтэннилэр

Бу  кадрдарга тохсунньу 8 күнүгэр  Халыма федеральнай айан суолун 35 км. тахсыбыт суол быһылаана көстөр. Мэҥэ Хаҥалас улууһун Төхтүр бөһүөлэгиттэн чугас, трассаҕа 5 массыына харсыспыт. Суолга-иискэ куттал суох буолуутун хааччыйар инспиэксийэ иһитиннэрэринэн икки киһи эчэйии ылан балыыһаҕа киирбиттэр. Харсыһыы туохтан тахсыбыт төрүөтүн быһаараллар. Маныаха суол быһылаанын кыттыылаахтарыттан аһыы утах хааннарыгар баарын бэрэбиэркэлээһин түмүгэр суоппардар бары испэтэхтэрэ бигэргэннэ. Быһа холоон массыыналар бэйэ бэйэни ситэр албаһы оҥорбуттарыттан суол саахала тахсыбыт буолуон сөп. Бэрэбиэркэ салҕанар.

Оттон бу күн өссө биир суол саахала Нерюнгри оройуонугар бэлиэтэннэ. Манна улахан кыамталаах массыына автобуһу кытта харсыспыт. Нерюнгри киин балыыһатыгар суһал көмө сулууспатынан 14 эмсэҕэлээбит киһини аҕаллылар. Биир киһи ыарахан туруктаах диэн иһитиннэрэллэр. Кинини травматология салаатыгар киллэрдилэр. Уоннааҕылар амбулаторно эмтэниини ааһыахтара. Саахал тахсыбыт чахчытынан Нерюнгри оройуонун прокуратуурата бэрэбиэркэни саҕалаата.  

Үгүс киһи эчэйиилээх улахан суол быһылаана Ороһуоспа күн Бүлүү федеральнай айан суолун 105-ис килэмиэтиригэр таҕыста. Манна биир киһи сырдык тыына быһынна, сэттэ киһи араас таһымнаах эт хаан эчэйиитин ыллылар. Саха сирин доруобуйа харыстабылын министиэристибэтэ иһитиннэрэринэн Горнайдааҕы киин балыыһаҕа 5 киһи киирбит, мантан 3 киһи орто туруктаах, оттон икки киһи ыарахан туруктаах сытар. Онон бу дьону киин куоракка 2-с нүөмэрдээх өрөспүүбүлүкэтээҕи балыыһаҕа санавиацианан аҕалыахтара. Эчэйбиттэргэ медицинэ көмөтө толору оҥоһуллар диэн тустаах биэдимистибэҕэ иһитиннэрэллэр. Оттон бу суол саахалын чахчытынан Россия силиэстийэлиир кэмитиэтин бэрэссэдээтэлэ Александр Бастрыкин холуобунай дьыаланы көбүтэргэ соруйда.