Оҕолоох ыаллары өйүүр регионнааҕы социальнай төлөбүрдэр кээмэйдэрэ үрдээтэ

Дойдуга Дьиэ кэргэн сыла уонна Өрөспүүбүлүкэҕэ Оҕо саас сыла бэртээхэй сонуннартан саҕаланна. Ол курдук Саха сиригэр 2024 сыл тохсунньу 1 күнүттэн оҕолоох ыаллары өйүүр регионнааҕы социальнай төлөбүрдэр кээмэйдэрэ үрдээтэ. Бу туһунан Үлэ уонна социальнай сайдыы министиэристибэтэ иһитиннэрэр. "100 сыл оҕолоро" хапытаал быйыл 110775 солкуобайга тэҥнэһиэҕэ. Бу тус сыаллаах хапытаал кээмэйэ сыллата үрдүүр, төлөбүр өссө биэс сылга уһаата, ол эбэтэр 2027 бүтүөр диэри көрүллэр. Онтон үс уонна онтон салгыы оҕо төрөөтөҕүнэ көрүллэр "Дьиэ кэргэн" Өрөспүүбүлүкэтээҕи хапытаал икки төгүл үрдээн 300000 солк. буолла. Маны сэргэ бастакы оҕо төрөөтөҕүнэ көрүллэр көмө эмиэ үрдээтэ. Бу төлөбүр Саха сиригэр зоналарынан көрөн арахсар. Ол курдук 1 зонаҕа 55694 солкуобай, онтон иккис зонаҕа 46650 солкуобайга тэҥнэстэ. Быйыл эдэр ыалга бастакы оҕо төрөөтөҕүнэ 8605 солкуобайы суударыстыбаттан ылыахтара. Онтон ый аайы үһүс оҕоҕо көрүллэр төлөбүр 1 зонаҕа 27847 уонна 2 зонаҕа 23325 солкуобайга диэри үрдээтэ. Маны сэргэ элбэх оҕолоох ыалга оскуолаҕа диэн көрүллэр төлөбүр 4302 солкуобай буолла. Итиэннэ төрөппүт 1,5 диэри саастаах оҕотун көрөн олорорун иһин төлөнөр ыйдааҕы пособие үлэҕэ эрдэ тахсар да түгэнигэр төлөнөр буолла.

Онтон Өрөспүүблүкэ бу сылга бюджетын дохуоттаах чааһа 302 миллиард, онтон ороскуот кээмэйэ 311 миллиардка тэҥ. Мантан аҥаарын кэриҥэ социальнай хайысхаҕа тыырылынна. Ол курдук бу сыл 1 күнүттэн хамнас алын кээмэйэ 18,5% үрдээн Саха сиригэр 48105 солкуобайга тэҥнэстэ, онтон хоту оройуоннарга 53878 солкуобай буолла. Маны сэргэ кэккэ бүдьүөт үлэһиттэригэр уонна социальнай төлөбүр сорох көрүҥэр 5,5% индексация оҥоһуллуоҕа.

Бу сылга пенсия төлөбүрүгэр эмиэ кэккэ үрдээһиннэр баар буолуохтара. Ол курдук үлэлээбэт биэнсийэлээхтэргэ, инбэлииттээхтэргэ, төрөппүтэ суох хаалбыт оҕолорго пенсия 7,5% улаатыаҕа.

Маны тэҥэ олимпийскай, паралимпийскай уонна сурдолимпийскай чемпионнары бэлэмнээбит тренердэр пенсиялара улаатта. Онтон алтынньыттан байыаннай пенсияны ылыыааччыларга 4,5% эбиллиэҕэ. Бу сыл социальнай төлөбүрдэригэр уларыйыы бу күҥҥэ маннык.