Саха түмэлигэр саҥа дьыллааҕы ретро быыстапка турда

Саҥа дьыллааҕы харыйа оонньуурдарынан дойдубут историятын билиэххэ сөп. Холобура, Гагарин көтүөҕүттэн ракеталар, космонавтар элбээбиттэрэ. Россияҕа таас оонньуурдары хамаҕатык 50-с сыллартан оҥорор буолбуттара. Бу кэмҥэ хаар киһилэри, оҕурсулары , лимоннары, эһэлэри харыйаҕа көрүөххэ сөп этэ. Оттон 60-с сылларга тыа хаһаайыстыбатыгар сыһыаннаах оонньуурдар дэлэйбиттэр. 70-80-с сыллар кэрэһиттэрэ мас туораахтара. Сэбиэскэй кэминээҕи саҥа дьыллааҕы мал-сал быыстапкатыгар биирдиилээн түмээччилэр хомуйуулара турда.

Ирина Яковлева, Саха түмэлин методиһа: «Биһиги тһүмэлбит “Коллекционеры Якутии” диэн түмсүүнү кытта үлэлэспитэ хас да сыл буолла. Быйыл Саҥа дьылга анаан “Саҥа дьыллааҕы винтаж” диэн быыстапканы ттуруордубут. Онно биэс киһи кытынна».

Быыстапкаҕа турбут саҥа дьыллааҕы маллар хас биирдиилэрэ ураты хатыламмат көстүүлээхтэр. Хомуйааччылар үгүс сылларга сыралаһан туран муспут открыткаларын, значоктарын, оонньуурдарын киһи сөҕө-махтайа эрэ көрөр. Үгүс киһиэхэ оҕо саас үтүө өйдөбүлүн иҥэринэр экспонаттар сүргэни көтөҕөллөр, Саҥа дьыл тыынын бэлэхтииллэр. Маны барытын түмэл үлэһиттэрин умсугутуулаах кэпсээнэ ситэрэн - хоторон биэрэр. Холобура, өрөбөлүүссүйэ кэнниттэн таҥара хаалынньаҥ бырааһынньыга диэн Саҥа дьылы тохтото сылдьыбыттара. Онтон Сталин төнүннэрбитин кэннэ харыйа оонньуурун маассабайдык оҥорон бараллар.

Маны сэргэ саҥа дьыллааҕы сүүһүнэн значоктар көрдөрүүгэ турбуттар. Тымныы моруос, хотугу тиэмэҕэ аналлаахтары сүүмэрдээбиттэр. Быыстапкаҕа сэбиэскэй кэминээҕи саҥа дьыллааҕы лоторея билеттарын кытта көрүөххэ сөп. Онтон Дергилев, Исаков, Зарубин оччолорго айан кэбиспит сүрэхтэн сүппэт открыткалара хас биирдии киһиэхэ урукку кэмнэри санатан ааһаллар.

“Открыткалары Мария Плюснина хомуйуутуттан туруордубут. Кини сэбиэскэй открыткалары муһууннан үлүһүйэр. Бу быыстапкаҕа турбут коллекциятынан кини хас да куонкуруска кыайбыта. Манна саамай эргэ открытката 1952 сыллааҕы. ”

«Саҥа дьыллааҕы винтаж» диэн быыстапка тохсунньу бүтүөр диэри киин куорат олохтоохторун уонна ыалдьыттарын күүтэр.