Саха циркэтэ Казахстан уонна Москва артыыстарын кытта туруорууну көрдөрүө

86

Иннокентий Слепцов уонна Александр Голиков кутталлаах нүөмэрдэригэр бэлэмнэнэллэр. Хас биирдиилэрэ эргийэ сылдьар көлүөһэ иһигэр, үрдүгэр араас албастары оҥорор. Бу трюгу оҥоруохтарын баҕарбыттара ыраатта, ол эрээри реквизит быйыл саҥа кэлэн, баҕа санааларын олоххо киллэрдилэр.

Иннокентийдаах, Александр циркэ эйгэтигэр киирбиттэрэ үйэ чиэппэриттэн орто. Акробаттар эрдэ атын хайысханы баһылаабыт эбит буоллахтарына, быйылгы дьылтан кинилэр иккиэ буолан хорсун көлүөһэҕэ дьоҕурдарын арыйыахтара. Маннык кутталлаах албаһы толоруу сүрүн ыарахана туохха сытарын артыыстар үллэстэллэр.

Иннокентий Слепцов, СӨ култууратын туйгуна: «Бу көлүөһү олус сэрэхтээх. Ол иһин киһи хас күн аайы күүстээх санаалаах кэлиэхтээх. Ыллыҥ да табыллыбат».

Александр Голиков, СӨ култууратын туйгуна: «Былаан уруккаттан баар этэ. Көлүөһэбит уруккаттан баар этэ. Ону быйыл саас Иннокентий ылсыахха диэн этии киллэрэн эрчиллэ сылдьабыт».

Хотугу норуоттар остуоруйаларынан Мария Харлампьева-Попова саҥа туруорууну оҥордо. Манна туох баар циркэ артыыстара бары кыттыыны ылаллар. Сүрүн оруолга оонньуур оҕолор Саҥа дьыллааҕы өрөбүллэргэ икки састаабынан толоруохтара. Ийэ оруолун салгын гимнаската Парасковья Илларионова, оттон аҕа оруолун Спартак Романов толоруохтара. Дириҥ ис хоһоонноох туруоруу сүрүн санаатын туһунан кэпсээтэ.

Мария Харлампьева-Попова, СӨ култууратын бочуоттаах дьайыксыта: «Төрөппүт уонна оҕо сыһыаннарын көрдөрөр ис хоһоонноох туруоруу. Хотугу норуоттар олохторо-дьаһахтара, олоххо сыһыаннара көстөр».

Казахстантан уонна Москва куораттан ыҥырыылаах ыалдьыттар Саха сирин олохтоохторугар анал бырагыраама илдьэ кэллилэр. Артыыстар Саха сиригэр бастакы сырыылара буолан, сөхпүттэрэ олус элбэх.

Фарида Аширбакиева, Казахстан акробата: «Роликтаах акробаттар уонна боруобакка толоруллар нүөмэри көрдөрөбүт. Бэлэмнэммиппит балтараа сыл буолла».

Тамерлан Куанышкали, Казахстан акробата: «Туруорууну олус диэн сөбүлээтим. Норуот уратытын көрдөрөр, артыыстар национальнай таҥастаахтара сөхтөрөр. Тыаһа-ууһа, туруоруута барыта астык».

Остуоруйа аптаах-алыптаах эйгэтигэр көрөөччүлэри Саҥа дьыл өрөбүллэрин устата күүтэллэр. Артыыстар кыттар бириэмэлэригэр көрдөрүү тыыннаах доҕуһуолунан барыа. Икки чаас устата хатыламмат нүөмэрдэр, ураты көстүүлэр барыта биир аренаҕа түмүллэн бастыҥ туруорууга тиһиллиэхтэрэ. Ол курдук таба, хаски уонна аляска маламуттара, өйдөөх мэччиргэ, холууптар уонна да араас кыыллар баар буолаллара күүтүллэр.