"Күөх риэйстэр" көттүллэр.

Саамай ыраах сытар улуустарбытыгар, ол эбэтэр Арктическай уонна хоту оройуоннарга саҥа дьыллааҕы бородуукталара тиийдэ. Күн бэҕэһээ бүтэһик "күөх риэйс" Орто  Халыма улууһун киинигэр тиийбитэ уонна салгыы нэһилиэктэрэгэ илдьиллиэҕэ.

Пётр Андросов,  "Якутоптторг" тэрилтэ уунан уонна халлаанынан таһаҕаһы тиэйии салаатын салайааччытын солбуйааччы: «Быйылгы салгынынан таһыыбытын этэҥҥэ түмүктээн эрэбит. Бу сылга уопсайа 71 сырыы оҥоһулунна. Онон былааннаммыт кээмэй буолла. Сөмөлүөтүнэн тиийбит таһаҕастан Булуҥ биир нэһилиэгэр уонна Орто Халыма түөрт нэһилиэгэр салгыы массыынанан тириэрдиэхпит».

Күн - дьыл туран биэрэн, мандарин, дьаабылыка, банан, оҕуруот аһыттан хортуоппуй, хаппыыста, сүбүөкүлэ, оҕурсу, помидор, сымыыт, бурдук онтон да атын Саҥа дьыл сандалытын киэргэтэр битэмииннээх ас-үөл тиийдэ. 

Степан Ефимов, ыскылаат сэбиэдиссэйэ: «Кыһыҥҥы суолунан барыахтаах табаардарбытын билигин номнуо бэлэмнии сылдьабыт. Онтон бу Саҥа дьыл иннинэ сүрүннээн оҕуруот аһа уонна фрукта барда. Маны сэргэ түргэнник буорту буолар астары ыыттыбыт. Сыанабыт үчүгэй. Чааһынай эргинээччилэртэн чэпчэки».

Манна даҕатан эттэххэ, урукку кэмҥэ тырааныспар тиһигэ уустук буолан, Арктикаҕа ас-үөл сыаната киһини дьиксиннэрэрэ. Билигин “Якутоптторг” тэрилтэ саҥалыы хайысханан үлэлээн, тиэйии бырылын уларытан, холобура, урукку кэмҥэ 8000 туоннаттан тахса эрэ бородуукта тиийэр эбит буоллаҕына, билигин  логистика чыҥха уларыйан, 12 тыһыынчаттан тасха туонна бородуукта, таһаҕас тиийэр буолла. Маныаха биир киилэ бородууктаҕа барыс 400 - тан тахса солкуобайга тэҥнэһэн, хотулар син өрө тыыннахтара. Маны кытары быйыл 5 эргиэн логистическай киинэ арыллыбыта.

Анна Григорьева, "Якутоптторг" тэрилтэ атыыга уонна эргиэҥҥэ салаатын салайааччыта:«Быйыл биһиги тэрилтэбит 20 сыла буолла. Бу сыллар тухары хоту улуустары аһынан-үөлүнэн хааччыйан кэллибит. Бүтэһик сылларга олус диэн сайынныбыт.  Күн бүгүн 7 улууска эргиэн логистическай киинин туттубут».

Оттон эһиил саҥа 2024 сылга тустаах тэрилтэ хоту уонна Арктическай улуустарга 5300 туонна аһы-үөлү илдьэр соруктаахтар.