Саҥа дьылы көрсө “Сайсары” ырыынакка сыананы үөрэттибит

63

Сыл сүрүн бырааһынньыгар бэлэмнэнии сүпсүлгэнэ салгыҥҥа кытта тарҕаммыкка диэри, уот-күөс холбоммута аан дойдуга баар саамай хотугу ырыынага ордук киэргэтэн көрдөрөр. Сарсыардаттан киэһээҥҥи диэри кэлии-барыы оргуйан олорор. Өссө ааспыт сылтан саҕалаан олохтоох эккэ сыана тос курдук үрдээбитэ харахха тута быраҕыллар. Холобура, убаһа ойоҕоһо киилэтэ балтараа тыһыынча, хаана икки тыһыынча кэриҥэ, хаһа - икки тыһыынча.

Айсен Антипьев,  эт атыылааччы: «Убаһа этэ 800 -1500 солк. диэри халбаҥныыр Убаһа, ынах быра баар. Убаһа киэнин атыылаһарга табыгастаах буоллун диэн 300гр  гына кырбастаан атыылбыыт. Киилэтэ 4000солк.».

Светлана Барашкова,  эт атыылааччы: «Убаһа этэ Амма киэнэ, оттон ынах этэ Таатта. Ынах этэ 700-900солк. диэри. Онтон хаһа 2000 солк.».

Ынах этин киилэтин 700 солкуобайтан, оттон убаһа этин биир тыһыынчаттан саҕалаан атыылаһыахха сөп. Эриллибит эт сэттэ киилэтэ 800, сибиинньэ этэ киилэтэ 450-500 турар. Онон баҕалаах эти биир үксүн.

Саха сирин күөллэригэр, өрүстэригэр үөскүүр балыгы амсайыан баҕалаах талбытын ылар кыахтаах. Соботтон, сордоҥтон, күндүөбэйтэн, дьарҕааттан саҕалаан чыыр, уомул балыкка тиийэ эгэлгэ көрүҥ барыта кыстаммыт. Ырыынакка балык сыаната кырдьык көмүскэ тэҥ. Холобура, собону килэтин 300-350 солкуобайтан, оттон үрүҥ кыһыллар балыгы кыччаабыта биир тыһыынчаттан саҕалаан атыылаһыахха сөп.

Индигиркэ салаат оҥорорго ыраастаммыт, быһыллыбыт чыыр 500 гыраама биир тыһыынча. Булт этин амсайыан баҕалаахха куобах кытта баар. Отон, сир аһын араас көрүҥэ эмиэ хото тэлгэммит. Отон 5 лиитэрэтэ 1300 турар. Ырыынакка эт, балык эгэлгэтин үгүс дьон музей курдук көрөбүт диэн этэллэр. Манна куорат эрэ олохтоохторо буолбакка, улуустартан кытта кэлэн атыылаһан бараллар.

Бу күннэргэ манна дьон кэлиитэ өссө элбиэ турдаҕа. Бырааһыньыктааҕы остуолга деликатес аһы амсайар инниттэн сорох дьон сыананы кэрэйбэт. Төһө кыалларынан кыраны да буоллар атыылаһарыгар эрэ тиийэр. Оттон сорох ырыынагы олох да кыйа хаамар.