"Эмис соболоох" хаһаайыстыбаҕа үрүҥ илгэ кыһыннары үрүлүйэр

61

Пиэрмэ бастаан тэриллэригэр 34 сүөһүлээх, 4 үлэһиттээх кээпэрэтиип быһыытынан саҕалаабыта, онтон бырагыраамаҕа тиксибэппит диэн салгыы бэйэ хаһаайыстыбатын сайыннарар сыалтан 2016 сыллаахтан бааһынай хаһаайыстыбаҕа көспүттэрэ. Хаһаайыстыба ньыматынан икки хотону туттарбыттар, бастаан 50, оттон 100 миэстэлээх. Онно эбии сэбиэскэй хаһаайыстыба хотонун саҥардан туһана сылдьыбыттар. 2020 сыллаахха бырагыраамаҕа киирэн 220 миэстэлээх улахан хотон туттараллар, уонна дьиэ кэргэн пиэрмэтэ бырагырааманан 100 миэстэлээх эдэр сүөһү хотоно олоххо киирэр. Пиэрмэ салайааччыта кыстык хайдах быһыылаахтык барарын үллэстэр.

Акулина Львова, "Эмис соболоох" бааһынай хаһаайыстыба салайааччыта: «Оппут, сенажпыт, комбикорм баар. Билигин улахан таһыыта эрэ хаалан турар. Оппутун суортаан ынахтар төрүүллэригэр диэн хаалларан турабыт».

Сүөһүлэрин икки хотонунан кыстаталлар. Улахан хотоҥҥо 4 доярка, биир оператор уонна биир от киллэрээччи, оттон кыра хотоҥҥо 2 бороон көрөөччү уонна 1 субан көрөөччүнү кытта бостуук үлэлиир. Хара сарсыардаттан, хара киэһээҥҥи диэри хотон үлэтэ күөстүү оргуйар.

Аны сайын сөптөөх үп-харчы көһүннэҕинэ, ньирэй хотонун туттары былаанныыллар. Уонна маны таһынан кыстык кэмигэр эбии аһылык буолуо диэн, бурдук ыһыытынан дьарыктанар буолуохтара. Боруобаҕа диэн ыһан көрбүттэрэ, быйаҥнаах Булгунньахтаах сиригэр үчүгэйдик үүнэр эбит диэн эһиилгиттэн дэлэтиэхтэрэ. 4 сааһыттан ынах көрөр ыанньыксыт хаһаайыстыба сүрүн түбүгүн туһунан кэпсээтэ.

Аграфена Гаврильева, ыанньыксыт: «Билигин биирдэ ыыбыт. Маассабай төрөөһүн кулун тутартан саҕаланыаҕа. Мин манна иккис ыйбын үлэлиибин, коллективпын сөбүлээтим, хамнас кэмигэр кэлэр».

Хайа баҕарар хаһаайыстыбаҕа буоларын курдук, кыстык этэҥҥэ барара күннэтэ түбүгүрэр бэриниилээх үлэһиттэр эппиэтинэстэрэ буолар. Хаһаайыстыба сүөһүлэрин бастыҥ аһынан аһатан, хотон ыраас көрүҥүн тутарга кыһаналлар. Аһылык туһунан ыанньыксыт үллэстэр.

Саргылаана Иванова, ыанньыксыт: «Күҥҥэ биирдэ элбэҕи биэрэбит уонна киэһэ кэлэн харбаан тарыйан биэрэбит. Билигин эбии аһылыктарыгар бурдук бэриллэр, онтон саас сенаж ситиэхпит».

450 га сиртэн быйыл 661 туонна от оттонон, этэҥҥэ сыл тахсан эрэллэр. Оттон ыаныллыбыт үүт барыта Хаҥаластааҕы оҥорон таһаарар бөлөҥ тэрилтэҕэ барар.