Хатас оскуолатыгар эбии тутуу үлэҕэ киирдэ

Хатас нэһилиэгэр бэлиэ күн үүннэ, оскуола эбии саҥа куорпуһун аһыллыытыгар Ил Дархан ыалдьыттаата. Сарсыарда эрдэттэн баһылык кылаастарынан сырытта, үөрэнээччилэри, учууталлары кытта көрүстэ, үлэ-хамнас туһунан билистэ. Кини бэлиэтээбитинэн, быйыл социальнай эбийиэктэри тутуу бырайыагынан үс оскуола тутулунна. Куорат Прометей оройуонугар, 26 нүөмэрдээх оскуола уонна  Хатаска оскуола эбии дьиэлэрэ үлэҕэ киирдилэр.

Алина Максимова, Хатас орто оскуолатын 11 кылааһын үөрэнээччитэ: "Биир симиэнэҕэ көспүппүт үчүгэй. Оҕолор бары бииргэ үөрэнэр буолуохпут. Саҥа оскуолабыт элбэх саҥа тиэхиникэлээх. Онон оҕолорго сайдыы баар буолуоҕа. Инниктин ситиһиибит үксүө дии саныыбын".

Хатас бэйэтин оскуолата 2004 сыллаахха 400 үөрэнээччигэ анаан тутуллубута. Нэһилиэк сыллата кэҥээн, улаатан иһэр, билигин нэһилиэнньэтин ахсаана номнуо сэттэ тыһыынча кэриҥэ киһи. Оттон оскуола үөрэнээччитин ахсаана биир тыһыынчаттан тахсыбыт. Онон оҕолор икки симиэнэнэн үөрэнэргэ күһэллэллэр. Мантан инньэ бу кыһалҕа быһаарыллан оҕолор үс этээстэх саҥа аныгылыы оҥоһуулаах бары ирдэбилгэ эппиэттиир усулуобуйаҕа үөрэнэр кыахтаннылар. Саҥа эбии куорпус иэнэ 5тыһ. кв. миэтэрэ иэннээх.

Николай Слепцов, Хатас орто оскуолатын дириэктэрэ: "Биһиги оҕолорбут бастакытын 5 – 11 кылааска диэри биир симиэнэҕэ үөрэнэр дьоллоннулар. Онон биһиги Ил Дархан Айсен Николаевка, өрөспүүбүлүкэ, куорат салалтатыгар уонна оскуолабытын туппут хампаанньаҕа махтанабыт".

Манна үөрэнэр  улахан кабинеттар, библиотека, аһыыр остолобуой, 140 миэстэҕэ анаммыт  актовай саала, киэҥ-куоҥ спорт саала, үлэ уруогар анаммыт мастарыскыай, киинэҕэ устар, хаартыскаҕа түһэрэр студия бааллар. Онон оҕо үөрэнэригэр, сайдарыгар сөптөөх усулуобуйа олохтонно.

Диана Васильева, Хатас орто оскуолатын дириэктэрин агротехнологическай хайысхаҕа солбуйааччы: "Агро-инжиниринговай киин арылынна, манна оҕолор эбии үөрэхтээһининэн дьарыктаныахтарын сөп. Эбэтэр манна бэйэ оҥорон таһаарыытын айан таһаарыахтарын  уонна атыыга тахсыар диэри бары түһүмэҕин бу кииҥҥэ оҥоруохтарын сөп".

Хатас оскуолата агро хайысхалаах. Онон үөрэнээччилэр оҕуруот аһын үүннэрэн, сир аһын үргээн астаан нэһилиэнньэҕэ таһаараллар. Аны быйылгыттан собону хатаран, бороһуок миин оҥорон таһаарбыттарын олохтоох нэһилиэнньэ хамаҕатык атыылаһар. Оскуола оҕону үөрэтиигэ, иитиигэ үгүс элбэх бырайыакка көхтөөхтүк кыттар, 2019 сыллаахха үөрэхтээһин национальнай бырайыак гранын ылары ситиспитэ, "Агрокуб" федеральнай научнай-үөрэтэр лаборатория пилотнай бырайыагар киирсибитэ. Салгыы оскуола усулобуйата тупсан, дьиэтэ кэҥээн үөрэх таһыма үрдээн, саҥа ситиһиилэр кэлиэхтэрэ турдаҕа.