Анал байыаннай эпэрээссийэҕэ сылдьааччылар оҕолоругар саҥа дьыллааҕы тэрээһин

Бэрдьигэстээхтэн анал байыаннай дьайыыга сылдьар эр дьон оҕолоругар анаммыт саҥа дьыллааҕы тэрээһин Мэхээлэ Дьөгүөрэп аатынан сынньалаҥ киинигэр Елизавета Мартынова туруорбут Тимофей Сметанин "Кыһыл былааттаах кыыс" остуоруйатыттан саҕаланна, оҕолор остуоруйа алыптаах дойдутугар киирэн, чуумпуран олорон көрдүлэр. Бу  күн чахчытынан Бэрдьигэстээх нэһилиэгиттэн СВО-ҕа уопсайа 61 киһи кыттыыны ылла, Быйылгы тэрээһин "Ийэҕэ көмө-оҕоҕо үөрүү" дойду президенин граныгар кыайбыт СВО кыттыылаахтарын оҕолоругар үөрэх кэннэ дьарыктар бырайыагын иитинэн барда, үлэни нэһилиэк ыччакка агентствотын иһинэн тэриллэн үлэлиир "Сарыал" кэмиэрчэскэйэ суох тэрилтэ аатыттан, агентство исписэлиистэрэ уонна нэһилиэк баһылыгын солбуйааччы Ксения Васильева суруйан көмүскээбиттэрэ.

Алексей Аргунов, Бэрдьигэстээх нэһилиэгин баһылыга: "Горнай улууһуттан уолаттарбытын көрсөн кэллибит. Оройуонтан гуманитарнай көмө уонна дьонноро ыыппыт баһыылкаларын тириэртибит. Кинилэр дьиэ кэргэттэригэр уонна оҕолоругар анаммыт тэрээһиннэр сылы быһа ыытылыннылар".

Оҕолору аралдьытар, сэргэхситэр оонньуулары нэһилиэк дьаһалтатын иһинэн үлэлиир кыраайы үөрэтэр түмэл, оҕо модельнай библиотеката, сынньалаҥ киинэ, ыччат агентствота уонна култуура колледжын икки устудьуон кыргыттара ыыттылар. Ааспыт 2022 сыл балаҕан ыйыгар быстах хомуурга маҥнайгынан ыҥырыллан анал эпэрээссийэҕэ барбыт Андрей Оленов бу күннэргэ дойдутугар уоппускаҕа кэлбит, кини хорсун буолууга уолаттарын бэйэтин холобурунан иитэр.

Андрей Олёнов, анал байыаннай дьайыы кыттыылааҕа: «Мин уоппускаҕа кэлэ сылдьабын. Оҕолорго анаммыт тэрээһин буолла. Администрация бу курдук өрүүтүн күүс-көмө буолара олус үчүгэй».

Бу күн сынньалаҥ киинигэр кэлбит байыаннай дьайыы кыттыылаахтарын төрөпүттэрэ, кэргэттэрэ, оҕолоро олохтоох оҥорон таһаарааччылар бородууксуйаларыттан нобуордары тутан өттүк харалаах, илии тутуурдаах бардылар. Ынах арыылаах, кырбастаммыт уонна эриллибит эттээх кэмпилиэги улуус дьаһалтатыттан уонна нэһилиэнньэттэн киирбит көмө үбүнэн хомуйбуттар. Ас нобуорун улуустааҕы бэтэрээн сүбэтэ түҥэттэ.

Любовь Пахомова, Горнай улууһун бэтэрээннэр сүбэлэрин бэрэссэдээтэлэ: "Нобуорбутугар 2 киилэ ынах этэ, эриллибит эт, ынах арыыта уонна мас арыыта. Былырыын 67 буойуннаах этибит оттон быйыл икки төгүл элбээтилэр. Онон үппүтүн эптэрэммит, икки өттүнэн кыттыһан былырыыҥҥы курдук нобуору оҥордубут".

Бу курдук оҕолор уонна кинилэр ийэлэрэ үөрүүлээх көмө тэрээһинтэн астынан үөрэн тарҕастылар, онтон саҥа сылбыт үүнэрэ улам чугаһаан иһэр, бу кэмҥэ бары даҕаны эһиилги сыл иллээх-эйэлээх олоҕу түстүүрүгэр эрэллээх уонна баҕа санаалаах үктэнэбит.