Үтүө санаа харыйата - Эр санаа холбуйата
Тымныы моруос оҕонньору бары күрүгүөмүнэн ыҥыран, Саҥа дьыл бырааһынньыгын тутаах дьоруойа оҕолор иннилэригэр тахсар. Ырыа, үҥкүү аргыстаах Саҥа дьыл тыына Мэдиссиинэ киинин кырачаан эмтэнээччилэригэр тосхойдо. Тымныы моруос оҕонньор оҕолорго эҕэрдэтэ саҥа дьылы ыраах дьиэлэриттэн көрсөөччүлэргэ тиийдэ. Оҕолорго үөрүүнү-көтүүнү, оҕо саас умнуллубат биир түгэнин "Эр санаа холбуйатын" аахсыйата бэлэхтээтэ.
Людмила Николаева, М.Е. Николаев аатынан СӨ мэдиссиинэ киинин оҕону эмтиир салаатын дириэктэрэ: "Биһиги кииммитигэр 327 куойка миэстэ баар. Туох баар улуустан кэлэн эмтэнэллэр. Оҕолор бары Саҥа дьылга дьиэлэригэр тахсыбаттар. Онон балыыһаҕа хаалар оҕолорбутугар бырааһынньык оҥоробут. Биһиэхэ үтүө санаалаах дьон көмөлөһөр".
Тустаах аахсыйаҕа өрөспүүбүлүкэбит 40-тан тахса судаарыстыбыннай уонна чааһынай тэрилтэлэрэ кыттыстылар. Итиэннэ олохтоох дьон биирдиилээн бэлэхтэрин тиэртилэр. Уопсайа 3000-тан тахса бэлэх хомулунна. Бу барыта балыыһаҕа эмтэниини ааһар кырачаан оҕолорго ананар. Төһө да Саҥа дьыл алыптаах түгэнин дьиэлэригэр көрсүбэтэллэр, амарах санаалаах дьон көмөтүнэн Саҥа сылы көрсүү дьолун толору биллилэр. Тымныы моруос оҕонньор бэлэхтэри туттарда.
"Эр санаа холбуйата" аахсыйа Ил Түмэнтэн саҕаланан билигин өрөспүүбүлүкэбит бары улуустарыгар ыытыллар. Аны сотору кэминэн инфекционнай балыыһаҕа сытар уонна тыҥа сэллигин эмтиир диспансерга баар оҕолорго бэлэхтэри туттарыахтара.
Алексей Еремеев, Ил Түмэн бэрэссэдээтэлэ: "Бу аахсыйа биһиги Ил Түмэммититтэн саҕаламмыта. Онтон билигин 40 тахса тэрилтэ бу тэрээһиҥҥэ кытынна. Маннык аахсыйалар хайаан да ыытыллыахтар. Биһиги оҕолорго бэлэх оҥороммут Саҥа дьыллааҕы алып баарыгар оҕолору итэҕэтэбит".
Маны таһынан дойдубут үрдүнэн "Үтүө санаа харыйата" аахсыйа сыллата ыытыллар. Быйыл тохсунньу 29 күнүгэр диэри буолуоҕа. Манна эмиэ тэрилтэлэр, амарах санаалаах биирдиилээн дьон көмөлөһөллөр. Тулаайах, төрөппүт көрүүтэ-истиитэ суох хаалбыт оҕолорго, коррекционнай оскуола иитиллээччилэригэр саҥа дьыллааҕы бэлэҕи ким баҕарар оҥоруон сөп.
Аина Боёкова, менеджер: "Биһиэхэ бу аахсыйа ыытыллбыта хас да сыл буолла. Бу тэрээһиҥҥэ ким баҕар кыттыһыан сөп. Онуоха биһиги маҕаһыыммытыгар кэлэн оҕо баҕата суруллубут бирканы талан бэлэх оҥоруоххутун сөп".
Үтүө санаа, амарах сүрэх баар буолан олох араас кыһалҕаларыгар түбэспит кырачаан оҕолорго Саҥа дьыл алыптаах эйгэтин, тымныы моруос оҕонньор күүтүүлээх бэлэҕин туталларыгар туһуламмыт тэрээһиннэр оҕо саас биир умнуллубат түгэнин бэлэхтииллэр.
