Кэлэр сыл Оҕо сылынан биллэрилиннэ

Үүнээри турар 2024 сыл Саха сирин үрдүнэн Оҕо саас сылынан биллэриллинэ. Бу туһунан Ил Дархан Ил Түмэҥҥэ анал этиитигэр биллэрдэ. Онон саҥа сылга оҕолору көрүүгэ-истиигэ, кинилэр доруобуйаларыгар уонна сайдыыларыгар ууруллуоҕа. Бүгүҥҥү күҥҥэ өрөспүүбүлүкэҕэ 34 тыһыынчаттан тахса элбэх оҕолоох ыал баар, кинилэргэ сүүстэн тахса тыһыынча оҕо иитиллэр.

Айхал Габышев, "Саха сирин тутааччыларын сойууһа" ассоциация салайааччыта, СӨ аҕаларын түмсүүтүн бэрэссэдээтэлэ: "Оҕо – аймах хас биирдии норуокка олус күндү. Онон үүнэр сылы Оҕо сылынан биллэрбитэ олус мындыр быһаарыныы. Ону биһиги ыал аҕалара күүскэ өйүүбүт. Өрөспүүбүлүкэбит тэтимнээхтик сайдыытыгар аҕалар күүс-көмө буолуохпут диэн этэбит".

Геннадий Охлопков, СӨ үөрэх сайдыытын уонна идэ таһымын үрдэтэр институт иитии уонна эбии үөрэхтээһиҥҥэ кафедратын сэбиэдиссэйэ: "Оҕо ис хоһоон өттүнэн байарыгар уонна сыаннастары иҥэринэн киһилии киһи буолан тахсарыгар анаан үлэни-хамнаһы тэрийиэхтээхпит. Маныаха аҥардастыы төрөппүккэ эбэтэр оскуолаҕа эрэ соҥноон кэбиспэккэ бүтүн түөлбэ таһымыгар, бүттүүн уопсастыбаннас буолан бу хайысхаҕа турунуохтаахпыт".

Оҕо саас сылынан номнуо сүрүн торумнар, өйөбүл хайысхалара быһаарыллан тураллар.  Ол курдук "Өрөспүүбүлүкэ эдэркээн олохтооҕо" диэн карта, итиэннэ төрөөбүт тылбытынан саҥарар телеханаал баар буолуохтара уонна үрдүкү кылаас оҕолоругар уонна оскуоланы бүтэрээччилэргэ үөрэх сертификаттарын олохтуохтара. 

Ньургуна Соколова, СӨ үөрэх уонна наука миниистирэ: "Элбэх оҕолоох ыаллар оҕолоро орто анал үөрэххэ киирэллэригэр социальнай сертификаттары туттартыахпыт. Айсен Сергеевич кээмэйэ 20 тыһ. солк. буолар диэтэ. 9 кылааска баар 14 тыһыынча үөрэнээччи баар, үксүн бу оҕолору хаба сатыахпыт".

Ил Дархан Айсен Николаев бэйэтин туһаайыытыгар социальнай эйгэ уонна экономика бигэ туруктаах буоларыгар элбэх үлэ ыытылларын тоһоҕолоото. Суолталаах тутуулар олоххо киириэхтэрин бэлиэтээн туран дьадайыыны кытта охсуһуу сүрүн болҕомтону ылар диэн эттэ. Маныаха хас биирдии киһи бэйэ дьыалатын арынарыгар, дьарыктаах, үлэлээх, чэгиэн туруктаах, уһун үйэлээх буоларыгар дьулуһуохтаахпыт диэн баһылык бэлиэтээтэ.

Алексей Иннокентьев, "Ньурба улууһа" МТ баһылыга: "Сүөһү аһылыгын бэлэмнээһин, кээпэрээссийэ, сылгы иитиитин, үүт ыаһынын, түргэнник ситэр салаа курдук хайысхаларга быйыл хаһааҥҥытааҕар да элбэх үбүлээһин көрүлүннэ".  

Маны тэҥэ үүнэр көлүөнэни, ыччаты патриотическай иитиигэ угуйуу эмиэ сүрүн сыаллартан биирдэстэрэ. Маныаха "Патриот" диэн ыччат киинин тэрийэри сорудахтаата.

Пётр Шамаев, СӨ ыччат дьыалатыгар уонна социальнай сыһыаннаһыыларга миниистирэ: "Додйуга бэриниилээх буолууга көҕүлээһин үлэтин бырабыыталыстыба таһымыгар биир тэрилтэ иилиэхтээх-саҕалыахтаах, ону тэрийиҥ диэн эттэ. Онон биһиги үөрэбит".

Онон эрдэ бу сылларга ылыллыбыт сыал-сорук, чуолаан бастакы президеммыт Михаил Николаев саҕалаабыт оҥкуллара салҕанан барыахтара.Туруоруллубут былаан олоххо киирэн, инники сайдыыга эрэлээхтик хардыылыыбыт.