Дьокуускай бастыҥ иитээччитэ ааттанна

73

Иитээччи Алира Харайданова бэйэтин ааптарыскай ньыматынан оҥорбут остуол оонньуутун оҕолорого оонньотор. Кырачаан дьон олус интэриэстээхтик кинини истэллэр. Онтон Алира  Алексеевна "Бэби сити" диэн чааһынай оҕо саадын иитээччитэ буолар, онон оҕолор кинини билбэттэр. Ол эрээри иитээччи тутатына оҕолор болҕомтолорун бэйэтигэр тарта.

 

Алира Харайданова, куонкурус кыттыылааҕа: "Бүгүҥҥү күрэххэ мин бэйэм айбыт оонньуубун көрдөрдүм. “Олоҥхо дойдутугар тургутуулаах айан” диэн ааттаабытым оонньуубун. Манна оҕолор араас сорудахтары толорон тургутуулаах айаҥҥа туруналлар. Оонньуу кэмигэр оҕо толкуйдуур дьоҕура, илиитэ сайдар".

 

Үөрэх уонна наука министиэристибэтин өйөбүлүнэн чааһынай оҕо уһуйааннарын икки ардыларыгар "Бастыҥ иитээччи - 2023"  күрэх аан бастакытын киин куоракка ыытылынна. Уопсайа куонкуруска 7 уһуйаан кыттыыны ылла. Кыттааччылар араас түһүмэхтэри аастылар.

 

Лена Троева – Лугинова, дьүүллүүр сүбэ чилиэнэ: "Түһүмэхтэр олус интэриэһинэйдэр. Чааһынай уһуйааннар диэн бэйэтэ эмиэ туспа көрүүлээх, ирдэбиллээх, кыһалҕалаах тэрилтэлэр. Мин олус диэн сөҕө көрдүм,чааһынай уһуйаанарга хайдахтаах курдук үөрэхтээһиҥҥэ улахан үлэ барарыттан".

 

Аан бастакытын ыытыллар күрэх "Белоснежка" оҕо уһуйааныгар ыытыллынна, оттон бу оҕо саада 2011 сыллаахтан үлэлиир. Күн бүгүн манна 7 бөлөҕүнэн 200-тан тахса оҕо сылдьар. Өрөспүүбүлүкэ таһымнаах куонкуруска уһуйааннар ох курдук бэлэмнэммиттэр.

 

Ксения Павлова, "Белоснежка" уһуйаан сэбиэдиссэйэ: "Оҕолору кытта дьарык барбыта. Ону сэргэ маастар – кылаас, профессиональнай кэпсэтии барбыта. Бары түһүмэхтэр биһиги уһуйааммытыгар аастылар".

 

Оттон чахчы кэлиҥҥи кэмҥэ муниципальнай оҕо саадтарыгар миэстэ тиийбэтэ баар көстүү. Онно улахан көмөнү чааһынай уһуйааннар оҥоро олороллор. Билигин бу хайысхаҕа судаарыстыба өтттүттэн улахан болҕомто ууруллар.Бу да күрэх онно туоһу.

 

"Бастыҥ иитээччи" куонкурус тыҥааһыннаах түһүмэхтэрэ ааһан, дьүүллүүр сүбэ мунньаҕынан, кыайыылаах аатын "Мэри Поппинс" диэн аттаах оҕо уһуйаанын иитээччитэ Надежда Рожина ылла. Оттон бу күрэх үгэскэ кубулуйан сыллата ыытыллыаҕа.