Сылгы ахсаана эбиллэр, онтон оҥорон таһаарыы мөлтүүр
Саха өрөспүүбүлүкэтин тыатын хаһаайыстыбатын министиэристибэтэ 2023 сыл түмүгүн таһаарар. Быйылгы сыл инники сыллардааҕар улахан уларыйыыта суох ааһан эһэр диэн мунньах кыттыылаахтара бэлиэтииллэр. Сүрүн болҕомто сүөһү аһын бэлэмнээһинигэр ууруллар. Ол курдук, быйылгы кыстыкка киириини куһаҕана суоҕунан ааҕаллар. Кураан сайыннаах да улуустар былааннарын бары толорон, сорох-сорохтор куоһараннар кыстыктара этэҥҥэ ааһан иһэр.
Афанасий Антонов, Өлүөхүмэ улууһун тыатын хаһаайыстыбатын салалтатын салайааччы: «Оппут былаанын аһары толорбуппут. Онтон быйыл Өлүөхүмэ улууһугар кураан буолан сенажпыт мөлтөх этэ. Ол эрэн кыстыгы этэҥҥэ туоруохпут диэн эрэллээхпит».
Улуустар бары кэриэтэ бэриллибит быылааны толоро сатаабыттарын бэлиэтээтилэр. Ол эрэн үрүҥ ас, эт былаана бүтэһик сылларга олох мөлтөх көрдөрүүлээҕин иһитиннэрдилэр. Саха сирэ бэйэтин этинэн, үүтүнэн толору хааччынар кыаҕа суох туруктааҕын, аны кэлэр сылларга аччатарга күүстээх үлэ ыытыллыаҕа. Онтон таба хаһаайыстыбатыгар көрдөрүү үчүгэйэ билиннэ. Аҥардас Анаабыр улууһа сыллата 23 тыһыынчаттан тахса табаны кыстатар. Бу көрдөрүү сыллата эбиллэр.
Туйаара Николаева, Анаабыр улууһун тыатын хаһаайыстыбатын салалтатын салайааччы: «Быйыл төрүөхпүт үчүгэй. Табаҕа былааммытын толорон эрэбит. 23300 табалаахпыт».
Хоту дойду төрүт олохтоохторун төрүт дьарыгар судаарыстыба өттүттэн күүстээх болҕомто ууруллар. Хас да тустаах бырагыраама үлэлиир.
Саха сирэ сыспай сиэллээҕинэн аатырар. Ол курдук, быйылгы сыл түмүгүнэн Уһук-Илиҥҥи региоҥҥа сылгыбыт ахсаанынан бастыҥынан ааттанныбыт. Онно эбиитин бүтэһик биэс сылга хороҕор муостаах ахсаанын сылгы куоһарда. Инникитин сыспай сиэллээҕи 209 тыһыынчаҕа тиийэ элбэтэр сорук турар. Улуустарга субвенция биэрии үлэтэ күүһүрэр.
Николай Афанасьев, СӨ тыа хаһаайыстыбатын миниистирин солбуйааччы: «Судаарыстыба туруорбут соругунан улуустарга субвенция кэнники сылларга 70% эбилиннэ. Холобура, 7 млдр тахса суумма улуустарга тиийэр. Бу улахан кээмэй. Онон эппиэтинэс икки өттүттэн буолар - министиэристибэ уонна оройуоннар. Онон бары ити көрдөрүүлэргэ үлэлээммит былааммытын толоруохтаахпыт диэн үлэни-хамнаһы кэпсэтэ олоробут».
2032 сылга диэри тыа хаһаайыстыбатын бары көрдөрүүтэ олуччу үрдүк таһымҥа таһаарар сорук турар. Онуоха улуустарга ыытыллар үлэлэри күүһүрдүү, саҥаттан-саҥа ньымалары туһаныы туһунан отчуоттуур мунньахха торумнастылар
