Өрүү үлэ үөһүгэр сылдьар Иннокентий Захаров

Саха сирин тыйыс тымныытын үлэ киһитэ аахсыбат. Бу курдук кини өрүү үлэ үөһүгэр сылдьар. Кини биригээдэтэ бетон кутаары бэлэмнээн билигин арматура үлэтигэр сылдьар. Омос көрдөххө туох да уустуга суох. Ол эрэн манна хас биирдии хамсаныы улахан суолталаах. Инникитин сүүһүнэн киһи олоруохтаах дьиэтин хаачыстыбата  быһаччы тутулуктаах. Бу олус эппиэтинэстээх үлэни биригэдьиир Иннокентий Захаров иилиир- саҕалыыр. Кини бу эйгэҕэ үлэлээбитэ 38-с сыл буолла, онон тутууга тэҥнээҕэ суох салайааччы.  

Иннокентий Захаров, "Якутспромстрой" тэрилтэҕэ тутуу биригэдьиирэ, "Үлэ киһитэ" бириэмийэ хаһаайына: "Тутууга барыта математика. Наар ааҕа, суоттуу сылдьыаххаа наада. Ыарахан үлэ. Уонна үчүгэй өйдөөх, толкуйдуур дьоҕуруҥ сайдыбыт буолара ирдэнэр”.

Кырдьык, тутуу диэн ыарахан үлэ, онон, бастатан туран бэрээдэк ирдэнэр. Маныаха үлэ режимын тутуһуу биир сүрүннэрэ. Сылы эргиччи дьиэ тутар тыас сарсыарда 8 чаастан ньиргийэр итиэннэ кыһыҥҥы кэмҥэ киэһэ 5 диэри. Онтон халлаан сылыйдаҕына үлэ чааһа биллэн турар уһуур. Онон тутуу үлэлэригэр бэриниилээх эрэ дьон үлэлиир үлэлэрэ диэн саарбаҕа суох этии. Бу билигин саҕаламмыт тутуу аны эһиил 9 мэндиэмэннээх дьиэ буолан үүнэн тахсыахтаах. 

Дьокуускай үгүс улахан тутуулара Иннокентий Захаров биригэдьиирдээһининэн тутуллубут. Ол курдук Оҕо дыбарыаһа, "Эллэй Боотур" споркомплекса, "Самородок" бассейн уонна Сахатеатра курдук эбийиэктэр, маны таһынан аата - ахсаана биллибиэт олорор дьиэ.

Иннокентий Захаров, "Якутспромстрой" тэрилтэҕэ тутуу биригэдьиирэ, "Үлэ киһитэ" бириэмийэ хаһаайына:"Бэйэҥ оҥорбут дьиэҥ дууһалаах курдук буолар. Сылаас кэлэр киһиэхэ. Баҕар миэхэ эрэ оннук буолуо. Санаабар биһиэнэ дууһалаах".

Иннокентий Захаров "Якутспромстрой" тэрилтэҕэ 40 - ча сыл үлэлиир.  Билигин кини биригээдэтигэр 15 киһи үлэлиир, муҥутаан 20 тахса буолаллар. Кинилэргэ Иннокентий Гаврильевич хас биирдиилэригэр аҕа табаарыс, уһуйааччы. Уопуттаах салайааччы тылын ким да быһа гыммат. Үлэһиттэр убаастабылларын кини бэйэтин үтүө холобурунан ылар.    

Иннокентий Захаров, "Якутспромстрой" тэрилтэҕэ тутуу биригэдьиирэ, "Үлэ киһитэ" бириэмийэ хаһаайына: "Барыларын көрө-истэ, билэ сылдьаҕын. Хас биирдии киһи олоҕор хайдах олорорун барытын билиэххэ наада. Ону билбэт буоллаххына киһини хайдах да күүс өттүнэн үлэлэппэккин”.

Иннокентий Гаврильевич билигин тутууга ыччаты сыһыарыыга үлэлэһэр. Бэйэтин кэнниттэн хаалар тутааччылары уһуйар. Онон тутуу ситимэ көлүөнэттэн көлүөнэҕэ салҕанар.