Кыстык хаамыыта

47

Хаҥалас улууһун Булгунньахтаах нэһилиэгин биир бөдөҥ хаһаайыстабата этэҥҥэ кыстыкка киирэн, билигин 237 төбө сүөһүлээх. Онтон сүүстэн тахсата ыанар ынах. Үс сыллааҕыта хаһаайыстаба тустаах бырагыраамаҕа киирсэн улахан хотоннору туттубута.

 

Акулина Львова, "Эмис соболоох" бааһынай хаһаайыстыба салайааччыта: "Үлэһит тиийбэтэ сүрүн кыһалҕа. Ынах-сүөһү көрүүтүгэр эбии үлэһиттэргэ наадыйабыт. Оппут, сенажпыт, комбикормабыт барыта баар. Билигин таһыыта эрэ хаалан турар. Ынахтарбыт төрүүллэригэр анаан суортаан хаалларбыппыт".

 

Бүгүҥҥү күҥҥэ Саха сирин үрдүнэн уопсайа 169 тыһыынчаттан тахса ынах-сүөһү, 196 тыһыынча сылгы кыстаан турар. Биэс тыһыынчаттан тахса төбө сыспай сиэллээх эбии аска бу нэдиэлэттэн киирдэ.

 

Александра Петрова, СӨ ТХМ сүөһү иитиитигэр департаменын сүрүннүүр исписэлииһэ: "5251 төбө сылгы  эбии аһылыкка киирдэ. Бу уопсай ахсаантан 2,7% буолар. Сунтаар, Үөһээ Бүлүү, Мэҥэ Хаҥалас, Өймөкөөн, Дьааҥы улуустарыгар аһатан саҕалаатылар".

 

Быйыл хаһааҥҥытааҕар даҕаны үтүө, өҥ сайын туран, кыстыкка киириигэ былааннаммыт от барыта оттоммута. Ол курдук  өрөспүүбүлүкэ үрдүнэн 463 тыһыынчаттан тахса туонна от оттонон, былаан сүүс биир бырыһыан туолбута. Онон хас да сылтан бэттэх от хамапаанньата ситиһиилээхтик түмүктэнэн хаһаайыстыбалар кыстыгы толору оттоох көрсүбүттэрэ. Сиилэс, сенаж эмиэ былаантан аһары бэлэмнэммитэ, онон ынах-сүөһү кыстыыр аһылыгар кыһалҕа үөскүө суохтаах. Улуустартан Хаҥаластар, Уус Алданнар, Аммалар уонна кэккэ улуус сүөһүлэрин ахсаанын эбэн үрдүк көрдөрүүлээх кыстыка үктэммиттэрэ.

 

Дмитрий Левин, Амма улууһун "Бөтүҥ" хаһаайыстыба бэрэссэдээтэлэ: "Кыстык этэҥҥэ баран иһэр. Сүөһү аһа тиийэр баар. Сыана ыарыыра тыа хаһаайыстыбатынан дьарыкатнааччыларга күүскэ охсор. Сэлээркэ, сапчаас сыаната улаатан ороскуоппут олус үрдээтэ". 

 

Быйылгы дьылга этиллибитин курдук улуустар үксүлэрэ отторун былааннарын толорбуттара.Сыллата тэриллэр мобильнай биригээдэлэр уопсайа 45 тыһыынча туонна оту  оттообуттара. Өймөкөөн улууһугар ууттан сылтаан кыһалҕалаах балаһыанньа үөскээн кыстыыр отторун кыайан булумматахтара. Кинилэргэ сотору кэминэн оту тиэйии-таһыы үлэтэ ыытллыаҕа. 

 

Вячеслав Гаврильев, СӨ ТХМ үүнүүгэ уонна материальнай-техническэй хааччыллыыга департаменын салайааччы: "Өймөкөөн улууһугар от тиэйиитигэр ыарахаттар үөскээннэр, Таатта улууһуттан илдьиини саҕалаатыбыт. Үбүлээһиннэрэ тиийэн турар. Суол турда эрэ үлэ саҕаланыаҕа".

 

Саамай сүрүнэ, кыстыыр от, ас саппааһа тиийэн, хас биирдии төбө ахсаанын энчирэппэккэ этэҥҥэ  кыстатан таһаарыы - сүрүн сыал-сорук. Халлаан тымныытынан, хотоннорго уоттан-күөстэн сэрэхтээх буолууга болҕомто күүһүрүөн наада.