Булчут билиэтин ылыыга саҥа сокуон

2024 сылга киириэхтээх уларыйыылартан биирдэстэрэ булчуттары таарыйыаҕа. Ол курдук, бултуур билиэти ылыыга уларыйыыны киллэриэххэ диэн дойду Бырабыытылыстыбата саҥа сокуон барылын киллэрэн олорор. Тустаах докумуон номнуо Судаарыстыбаннай дуума дьокутааттарын өйөбүлүн ылан Федерация сэбиэтигэр тиийэн сытар.

Анатолий Попов, Айылҕа харыстабылын министиэристибэтин булт хаһаайыстыбатын департаменын салайааччытын солбуйааччы: «Эһиил күһүҥҥүттэн бырайыак быһыытынан саҕаланыахтаах. Билиэти ыларга булчут анал эксээмэни туттарар. Бастаан 200 – чэкэ ыйытыыга хоруйдуохтаах. Маны таһынан үөрэниэхтэрэ. Онно анал тэрилтэлэр баар буолуохтара».

Билигин бултуур билиэти ыла илик дьон саҥа ирдэбил киирэ илигинэ ыла охсоору тиэтэйэллэр. Онтон саҥа киирээри турар уларыйыылары уопуттаах булчуттар сэҥээрэллэр эрэ.

Юрий Борисов, "Байанай" булчуттар кулууптарын салайааччыта: «Саҥа сокуон киириитин сэҥээрэбин эрэ. Тоҕо диэтэххэ сэбиэскэй кэм саҕана эмиэ итинник туттаран ылар этибит уонна булчуттар мэктиэлииллэр этэ. Билиҥҥи оҕолор үчүгэйдик кыылы-сүөлү билбэттэр, саанан сатаан туттубаттар. Онон анал үөрэх кэннэ көҥүл ылаллара сөптөөх дии саныыбын».  

Этиллибитин курдук, саҥа сокуон аны билигин Федерация сэбиэтин дьүүлүгэр сытар. Дойдубут сенатордара бигэргэттэхтэринэ, анал ыйаах таҕыстаҕына бу сокуон аны күһүҥҥүттэн үлэлээбитинэн барыаҕа.

Тустаах уларыйыыны булт кэмигэр сыллата буолар сыыһа-халты туттууттан тахсар ыар буруйдары аччатааһыҥҥа туһуланар, итиэннэ сааны-саадаҕы туттууга дьалаҕай сыһыан аччыырыгар ананар. Айылҕаҕа сөптөөхтүк туттан сылдьыы, бултанар кыыл-сүөл арааһын үөрэтии эмиэ бу бырайыакка киирдэ. Росгвардия Саха сиринээҕи салаата иһитиннэрбитинэн быраабыланы кэһии сыллата аччыыр. Тустаах уорган чуолаан сааны туттуу, харайыы өттүгэр хонтуруолу ыытар.

Сергей Никитин, Росгвардия федеральнай сулууспатын Саха сиринээҕи салалтатын Дьокуускай уонна Жатай лицензиялыыр-көҥүллүүр салаатын салайааччытын эбээһинэһин быстах кэмҥэ толорооччу: «Буруйу оҥоруу сокуону билбэттэн тахсар. Үксүгэр дьон сааларын болдьоҕун куоттараллар. Сокуон ирдэбилинэн болдьох туолуон биир ый иннинэ дөкүмүөннэрин туттарыахтаа».

Хомойуох иһин, бултка сылдьан араас киһи өлүүлээх түбэлтэ хас сыл аайы бэлиэтэнэр. Онон бу сокуон олоххо киириитэ хомолтолоох статистиканы аччатарга улахан өҥөлөөх буолуоҕа.