"Азия оҕолоро" спортивнай оонньууларга волонтердары хомуйуу бара турар

Чурапчытаҕы спорт институтун устудьуона, үөрэҕин аттаран 8 төгүлүн ыытыллар "Азия оҕолоро" норуоттар икки ардыларынааҕы  спортивнай оонньууларга волонтер быһыытынан үлэлээри сайаапка туһэрэ кэлбит. Кэлээтин кытары тэрийэр бөлөх оҕолоро кинини учугэй баҕайытык көрсөн, барытын быһааран биэрэн, эдэр киһи сайаапкатын хаалларан, номнуо испииһэккэ киирдэ.

Дамир Макаров, Чурапчытааҕы физическэй култуура уонна спорт институтун устудьуона: «Бу бүгүн “Азия оҕолоро” волонтердарын киинигэр суруйтара кэллим. QR-куотка киирэн баран номнуо бэлиэтэнним. Волонтердуур баҕалаахпын, 66 корпуска олордоллор, аһаталлар, үөрэтэллэр. Атын баҕалаах оҕолор кэлиэххитин сөп».

"Азия оҕолоро" норуоттар икки ардыларынааҕы 8 спортивнай оонньуулар дирекцията волонтердары хомуйуутун болдьоҕун уһатта. Билигин улахан, аан дойду таһымнаах тэрээһиҥҥэ 16 саастарыттан үөһээ оҕолору, ыччаттары волонтер быһыытынан хомуйуу салҕана турар.

Евгений Амбросьев, "Азия оҕолоро" норуоттар икки ардыларынааҕы 8 спортивнай оонньуулар дирекциятын тэрийэр хамыһыйатын исписэлииһэ: «Биһиэхэ буоллаҕына 2000 курдук волонтер сайаапкатын биэрбитэ. Бу ахсынньы ыйтан кинилэргэ сэһэргэһиилэр саҕаланаллар. Кинилэргэ бу күнтэн ыла тест ааһалларыгар сайт арылынна. Билигин электроннай почталарыгар тестары ыыппыпыт. Волонтердар онньууларга 20 хайысханнан арахсаллар уонна 1900 волонтер үлэлиир буолар. Хайысхаларга: суһал көмө, спортивнай эбийиэк, аккредитация, навигация, иһитиннэрэр арыаллааһын уонна да араас. Волонтердар куораты биир гына тарҕана сылдьар буолаллар. Туох баар спортивнай, аһатар эбийиэктэргэ, спортсменнар олорор сирдэригэр, пресс-киин баар сиригэр кинилэр улахан көмө оҥорор буолаллар аныгыскы сылга».

Маны таһынан билигин дьон куттала суох буолуутун хааччыйар сулууспа контролердарын сүүмэрдии тураллар. Бу хайысхаҕа үлэлииргэ 18 саастарыттан үөһээ уолаттары, эдэр ыччаты улэҕэ ылаллар. Кинилэргэ хамнас төлөнөр, таҥас бэриллэр, үөрэтии барар. Манна киириэн баҕалаах дьон 3,5 уонна 4,5 кээмэйдээх 2 хаартысканы, нарколог итиэннэ психиатр быраастан ыспыраапкалары уонна сууттаана сылдьыбатах диэн миэктиэ суругу туттарыахтаахтар. Оттон оонньуулар бэс ыйын 25 күнүттэн от ыйын 7 күнүгэр диэри ыытыллыаҕа.

Анна Самсонова, "Азия оҕолоро" норуоттар икки ардыларынааҕы 8 спортивнай оонньуулар дирекциятын тэрийэр хамыһыйатын исписэлииһэ: «45 Азия дойдутугар ыҥырыы ыытан турабыт. Уопсайа 2863 кыттааччы кэлэрэ кэтэһиллэр. Күрэхтэһиигэ 16 уонна аллараа саастаах оҕолор кыттыыны ылыахтара. Күрэхтэһии 16 эбийиэккэ 24 көрүҥүнэн буолуоҕа. Билигин эбийиэктэр өрөмүөҥҥэ тураллар. Саҥа тэриллэри ылаллар уонна тэрийэр хамыыһыйа федеральнай уонна өрөспүүбүлүкэтээҕи былаанынан күүстээхтик үлэлии сылдьар».

Онон ким спорт бырааһынньыгар кыттыһыан, бу тыыны ылыан баҕалаахтар yakutsk2024.org сайтка киирэн билсиэххитин сөп.