Саҥа дьыл алыптаах күннэрэ баҕа санааны толороллор

Хоту уонна арктическай улуустарга ас-үөл, наадалаах мал-сал чопчу ымпыга суох тиийэрин хонтуруоллуур, бэрэбиэркэлиир салаа тутаах улэһитэ Анна Григорьева бастакы баҕа санааны ылан аахсыйа саҕаланар. Өрөспүүбүлүкэ биир бөдөҥ, бородууктанан хааччыйа олорор тэрилтэтэ «Баҕа санаа харыйата» Арассыыйатааҕы аахсыйаҕа кыттыста.

Анна Григорьева, аахсыйа кыттыылааҕа: «Бу аахсыйаҕа кыттаммын наһаа үөрдүм. Оҕолор эҥин-араас үчүгэй баҕайы, интириэһинэй баҕа санаалаахтар эбит. Суол аһыланнаҕына оҕолорбут баҕа санааларын толорон ыытыахпыт. Миэхэ бу оҕо баҕа санаата түбэстэ - «новый волчок и арена для битвы» диэн баҕарбыт эбит Дьяконов Ильдар. Биһиги үөрэ-көтө бу оҕо баҕатын толоруохпут».

Саҥа дьыл алыптаах бырааһыньыга чахчы кырачаан дьон баҕа санаатын толорор соруктаах. «Якутоопторг» тэрилтэ атыы-тутуу дьиэтин дьэрэкээн харыйата оҕолор баҕа санааларынан толоруо. Бүгүн үлэһиттэр биир күргүөмүнэн кэлэн, бу истиҥ уонна үтүө тэрээһинтэн туора турбатылар.

Сайдам Степанов, «Якутоптторг» тэрилтэ генеральнай дириэктэри бастакы солбуйааччыта: «Анал байыаннай дьайыыга кытта сылдьар үлэһиттэрбит оҕолоро баҕа санааларын суруйан биһиэхэ ыыппыттара. Ону биһи «Якутоптторг» салайааччылара оҕолор баҕа санааларын саҥа дьылга толоруохпут. Миэхэ Фёдоров Игорь диэн 14 саастаах оҕо баҕа санаата түбэстэ - «Хочу научиться курсам графического дизайна» диэн. Ону биһи кини баҕа санаатын эбэһээт толоруохпут».

«Баҕа санаа харыйата» бүтүн Арассыыйа үрүдүнэн ыытыллар аһымал аахсыйаны Арассыыйа эдэр ыччатын кеҕүлээһининэн «Бастыҥнар хамсааһыннара» бырайыак чэрчитинэн тэрийбиттэрэ. Тустаах аахсыйа сэтинньи 15 күнүттэн саҕалаан кэлэр сыл кулун тутар 31-гэр диэри ыытыллыаҕа. Манна олох ыарахан очурдарыгар түбэспит оҕолор баҕа санаалара туолуохтаах.

Алёна Дьяконова, аахсыйа кыттыылааҕа: «Якутоптторг» тэрилтэ уопсайа Өрөспүүбүлүкэ үрдүнэн 18 филиаллах. Ол филиаллар улэһиттэрин оҕолоро баҕа санааларын биһиэхэ суруйан ыыппыттара, ону барытын манна ыйаабыппыт. Кыһыҥҥы суол турдаҕына, сотору кэминэн барытын толорон филиалларбытыгар ыытыахпыт, оҕолорбутун үөрдүөхпүт. Оттон бу аахсыйа Арассыыйа үрдүнэн барытынан буола турар эбит, үс форматтаах».

Кэлиҥҥи кэмҥэ маннык курдук барыллаах аахсыйалар үксүү тураллар. Онон аһыныгас, үтүө сурэхтээх дьон-сэргэ, маныаха тэрилтэлэр тустаах тэрээһиннэртэн туора турбакка кыттыыны ылан, үтүө дьыаланы салҕыаххытын сөп.