Дьокуускайдааҕы тыа хаһаайыстыбатын техникумугар эт аһылыгы оҥорон таһаарар сыах аһылынна

Дьокуускайдааҕы тыа хаһаайыстыбатын техникумун иккис кууруһун устудьуона Василий Степанов технолог идэтигэр уһуйулла сылдьар. Үөрэхпин бүтэрдэхпинэ бэйэ дьыалатын арынан чааһынай эргинээччи буолуом диэн былаанын үллэстэр. Устудьуоннар билигин практикаларын үгэнэ.

Василий Степанов, Дьокуускайдааҕы тыа хаһаайыстыбатын техникумун устудьуона: «Бэлимиэн оҥоруута сүрүн ис өлүүтүгэр маннааҕы бородууксуйаны туттабыт. Бэлимиэн аппаратын үөрэтэммит практикабытын бу сыахпытыгар бара сылдьабыт. Тиэстэбитин бэйэбит оҥоробут».

Сабыс саҥа сыах аһыллан устудьуоннар үөрэнэллэригэр, идэ үөрүйэхтэригэр дьиҥ-чахчы сысталларыгар толору кыах баар буолла. Ааспыт сылга техникум Профессионалитет федеральнай куонкурска кыттан бүтүн сүүс мөлүйүөн сууммалаах Гран ылар чиэскэ тиксибитэ. Ол гран үбүнэн уонна өрөспүүбүлүкэ өйөбүлүнэн бөдөҥ бырайыак олоххо киирдэ.

Альбина Герасимова, Дьокуускайдааҕы тыа хаһаайыстыбатын техникумун дириэктэрин солбуйааччы: «Бу гран усулуобуйатынан биһи оҥорон таһаарар тэрилтэлэри кытары: агрохолдинг “Туймаада”, СХПК “Хачыкаат”, Дьокуускайдааҕы көтөр фабриката уонна Нам, Өлүөхүмэ, Чурапчы, Харбалаах, Арктическай орто үөрэх кыһаларын холбоон ситим үөрэхтээһини туһанан Өрөспүүбүлүкэҕэ тыа хаһаайыстыбатыгар үөрэтэр-оҥорон таһаарар киин (кластер) диэн буолбуппут».

“Профессионалитет” биир эппиэттээх хайысхатынан үөрэтэр-оҥорон таһаарар комплекстары тэрийии буолар. Онон бу эт аһылыгы астыыр сыах арыйан үлэ саҕаланна. Манна кэтилиэт, фриакаделька, бэлимиэн арааһын, халабаһы хас даҕаны көрүҥүн, ыыһаммыт эт оҥоһуктары бэлэмниэххэ сөп. Оборудование барыта саҥа онон настройкаланан, бастакы тургутууну бара сылдьар.

Сыах оҥорон таһаарар кыаҕа улахан. Уоспайа 20 мөлүйүөн сууммалаах тэрил, оборудование таҥыллан турар. Аныгы ирдэбилгэ эппиэттиир хааччыллыы баара бородууксуйа үрдүк хаачыстыбалаах буоларын мэктиэлиир.

Наталья Филиппова, үөрэх уонна оҥорон таһаарар практика преподавателэ: «Эттэн бэлэм ас оҥорооччу диэни бара сылдьаллар. Практикалара икки нэдиэлэ буолуохтаах, бэҕэһээҥҥиттэн саҕалаатыбыт. Рецептуратын бэйэлэрэ суоттаан үчүгэйдик оҥорор буоллулар».

Бүгүҥҥү күҥҥэ техникумҥа 94 оҕо технолог идэтигэр үөрэнэ сылдьар. Манна устудьуоннар практика эрэ буолбакка, үөрэхтэриттэн тэйбэккэ эрэ баҕа өттүлэринэн хамнас аахсыахтарын сөп. Ол курдук кинилэр бэйэлэрин тутаах идэлэрин таһынан үлэһит идэтин баһылаан, үлэ ыстааһын ылар кыахтаахтар.

Вероника Алексеева, Дьокуускайдааҕы тыа хаһаайыстыбатын техникумун устудьуона: «Бастаан балаҕан ыйтан алтынньыга дылы үөрэммиппит онтон бу алтынньы ортотуттан номнуо практикаланан киирэн барбыппыт. Практикабыт эттэн бэлэм ас оҥоруу диэн. Бу бэлимиэн. Онтон өссө биир ый практикаланарбыт хаалла».

Күнүн ахсын араас көрүҥ бородууксуйаны бэлэмнииллэр. Бэлэм ас сотору кэминэн нэһилиэнньэҕэ атыыга тахсара күүтүллэр.