АГАТУ ипподромугар 30 тахса сүүрүүк ат кыстыыр

9 саастаах Айыына өссө 4 сааһыттан аттарга интэриэстээх. Кыыс оҕо туттара-хаптара үөрүйэҕин бастаан кэлбит киһи сөҕө көрөр. Дьөһөгөй оҕолоро киһи ис туругун сэрэйэллэр, онон акка киһи ис иһиттэн бэлэмнэнэн баран чугаһыыра ордук диэн Айыына бэлиэтиир. Улааттаҕына акка хатааһылыыр үөрүйэҕин өссө чочуйан, сүүрүүлэргэ кыттыан баҕарар.

Айыына Максимова, Дьокуускай куорат олохтооҕо: «Биһиги бастаан хаамабыт онтон сүүрэбит. Мин эһэм сылгыһыт. Хаҥалас улууһугар кини элбэх аттаах».

Сүүрүүк аттар Балаҕан ыйыттан саҕалаан аны кэлэр сылга диэри сынньалаҥҥа бараллар. Кэлии аттар Саха сирин тымныытын туораары кыһынын анал таҥас кэтэллэр. -40 кыраадыска диэри күҥҥэ биирдэ далга тахсан 1 чаас хаамтараллар, оттон улахан тымныыларга 30 мүнүүтэ. Константин Иванов көрүүтүгэр уопсайа 4 сүүрүүк ат баарыттан, билигин 3 аты дьарыктыыр, оттон биир тыйдарын Саҥа дьыл кэннэ таһаарыахтара.

Константин Иванов, жокей, тренер: «Билигин 7-тэн сылдьабыт, хойуут. Сайынын 4-тэн сылдьааччыбыт. Билигин кыстык этэҥҥэ, ас-үөл баар курдук. Боруода аттарга көрүүлэрэ-харайыылара олох атын. Бу саха аттара уонна тупсарыллыбыт хааннаах диэн бааллар. Көрүү-харайыы олох атын буолар».

4 көнньүүһүнэнэн 30-тан тахса ат эйэ-дэмнээхтик кыстыыр. Кыһыҥҥы кэмҥэ битэмиин, от бастыҥын аһаан-сиэн олороллор. Хаһаайыттара хара сарсыардаттан киэһээҥҥэ диэри көрүү-истии түбүгэр сылдьаллар.

Семён Лиханов, жокей, тренер: «Барыта эрэһиим, хонтуруол, үчүгэй ас ол онтон тутулуктаах. Эрчиллэр акка эрчиллэр киһиэхэ курдук түбүгү эрийэр уонна сүрүнэ көрүү-харайыы».

Николай Громов "Строд" салаатыгар 5 төбө баар. Көрөөччүлэр хас биирдиилэригэр сылаас сыһыаннарын бэрсэллэр. Биири атаахтаттахха, биир күнүүлээбиттии төбөтүн быктаран, болҕомто көрдүүр. Бу сүүрүүк сылгылар истэригэр үс сыллааҕыта тэҥнээҕин булбатах ыраас хааннаах сүүрүүк чөмпүйүөн ат баар.

Билигин аттар уойуу диэн бириэмэҕэ сылдьаллар. Сылаас сиргэ сытан, ас бастыҥын, иҥэмтиэлээҕин аһыыллар. Саҥа дьыл кэннэ биирдэ аргыый дьарыктарын саҕалыахтара. Саҥа кэлбит боруода аттарга тренер киһи улахан эрэли уурар. Спортсменнар курдук кинилэр эмиэ күрэх иннинэ улахан хас да түһүмэхтээх бэлэми ааһаллар. Кыһыҥҥы кэмҥэ аһылыктарын туһунан тренер кэпсиир.

Николай Громов, Амма улууһун Абаҕа нэһилиэгин "Строд" хаһаайыстыба тренерэ: «Баҕаран туран натуральнай аһынан аһата сатыыбыт, моркуоп игин. Оттон араас акка битэмиин элбэх билигин. Күн көрөрүн солбуйар битэмииннэр игин бааллар».

Сүүрүүк аттар көннөрү далга кыстыыр саха сылгылартааҕар уратыта диэн, биһиги кыһыммытыгар үөрүйэҕэ суох буолаллар. Уонна аны сайын кэлэн бастыҥ көрүҥүн сүтэрбэтин туһугар, төгүрүк сылы быһа эрчиллэр.